Türkiyə millisinin və "Beşiktaş"ın sabiq futbolçusu Nihat Kahvecinin həyat yoldaşı Fulya Kahveciyə qarşı zorakılıq etdiyi iddiası ilə saxlanıldığı bildirilir.
Oxu.Az Türkiyə mətbuatına istinadən xəbər verir ki, hadisə ötən axşam İstanbulda yerləşən restoranlardan birində baş verib.
İddiaya əsasən, cütlük arasında naməlum səbəbdən başlayan mübahisə qısa müddətdə davaya çevrilib. Hadisə şahidlərinin sözlərinə görə, Nihat Kahveci əvvəlcə həyat yoldaşına şillə vurub, daha sonra isə masanın üzərində olan şüşəni ona atıb.
Bundan sonra hadisə yerinə gələn polis əməkdaşları sabiq futbolçunu saxlayıblar. Nihat Kahvecinin bir müddət polis nəzarətində saxlanıldığı qeyd olunub.
Məlumata görə, Fulya Kahveci restorandan ayrıldıqdan sonra idarə etdiyi avtomobillə yol-nəqliyyat hadisəsinə düşüb. Türkiyə mətbuatı onun spirtli içkinin təsiri altında olduğunu da iddia edib.
Bununla yanaşı, yayılan xəbərlərdən sonra Fulya Kahveci sosial şəbəkə hesabında açıqlama yayaraq zorakılıq iddialarını qəti şəkildə təkzib edib.
"Nihat Kahveci ilə 19 iyul 2018-ci ildən etibarən evliyik və iki övladımız var. Sevgi və hörmət çərçivəsində münasibətlərimizi, dostluğumuzu və ailəmizi bu günə qədər qoruduğumuz kimi, bundan sonra da qoruyacağıq. Həyat yoldaşları arasında fikir ayrılığı və mübahisə ola bilər, amma bu, heç vaxt mənə qarşı zorakılıq göstərilməsi ilə nəticələnməyib. Bu cür yalan xəbərləri qınayıram. Belə xəbərləri yayanlar, heç olmasa, bizdən soruşa bilərdilər".
