Qubada qaya uçqununa görə bağlanan yolda hərəkət bərpa olunub

Qubada qaya parçalarının düşməsi səbəbi ilə bağlanan yolda hərəkət bərpa olunub.

Bu barədə Oxu.Az-ın sorğusuna cavab olaraq Azərbaycan Avtomobil Yolları Dövlət Agentliyinin (AAYDA) mətbuat katibi Anar Nəcəfli məlumat verib.

Onun sözlərinə görə, Quba-Qonaqkənd yolunun 31-ci kilometrində qaya parçalarının yolun hərəkət hissəsindən təmizlənməsi işləri başa çatıb və yolda hərəkət tam bərpa olunub.

11:10

"Quba-Qonaqkənd yolunun 31-ci km-də Azərbaycan Avtomobil Yolları Dövlət Agentliyinin (AAYDA) xüsusi texnikaları və canlı qüvvəsi cəlb olunub".

Bu barədə Oxu.Az-ın sorğusuna cavab olaraq AAYDA-dan məlumat verilib.

Bildirilib ki, yolun hərəkət hissəsinə düşən qaya parçalarının kənarlaşdırılması işləri aparılır:

"Qısa müddətdə yolda hərəkət bərpa olunacaq".

Aləmdə Nəsib

10:40

Aprelin 19-u səhər saatlarında Qubada "Təngə dərəsi" adlanan turizm ərazisində yolun hərəkət hissəsinə qaya parçası düşüb.

Oxu.Az AZƏRTAC-a istinadən xəbər verir ki, iri qaya parçası ərazidən keçən yeganə yolu tamamilə bağlayıb.

Nəticədə 10-dan artıq yaşayış məntəqəsinin rayon mərkəzi ilə nəqliyyat əlaqəsi kəsilib.

Əraziyə aidiyyəti qurumların əməkdaşları cəlb olunub.

Yolun açılması istiqamətində işlərə başlanılıb.