Tovuzda ağır qəzada xəsarət alanların vəziyyəti AÇIQLANDI

"Tovuz rayonunun İbrahimhacılı kəndində baş verən ağır yol-nəqliyyat hadisəsi zamanı xəsarət alan bir nəfərin vəziyyəti orta ağır olaraq qiymətləndirilir".

Bu məlumat Oxu.Az-ın sorğusuna cavab olaraq Tibbi Ərazi Bölmələrini İdarəetmə Birliyindən (TƏBİB) verilib.

"29 dekabr, saat 13:45-də yol-nəqliyyat hadisəsi nəticəsində xəsarət alan beş nəfər (dörd kişi və bir qadın cinsli olmaqla) Tovuz Rayon Mərkəzi Xəstəxanasının Təcili və təxirəsalınmaz tibbi yardım şöbəsinə təxliyə olunub. Müxtəlif travmalar alan şəxslərin hər birinə zəruri tibbi xidmət göstərilib. Bir nəfər digər tibb müəssisəsinə təxliyə olunub. Bir nəfərin müalicəsi Tovuz Rayon Mərkəzi Xəstəxanasında davam etdirilir. Vəziyyəti orta ağır olaraq qiymətləndirilir. Digər üç nəfər ambulator müalicə üçün evə buraxılıb. Bir nəfərin isə həkiməqədər ölüm faktı qeydə alınıb",- deyə məlumatda bildirilir.

Əzizə İsmayılova

16:32

Tovuz rayonunda ölümlə nəticələnən yol-nəqliyyat hadisəsi baş verib.

Oxu.Az xəbər verir ki, hadisə rayonun İbrahimhacılı kəndində baş verib.

VAZ-2104 markalı avtomobillə VAZ-2106 markalı avtomobilin toqquşması nəticəsində bir nəfər həyatını itirib, beş nəfər xəsarət alıb.

Oxu.Az-ın əldə etdiyi məlumata görə, həyatını itirən şəxs Tovuz rayon Köhnəqala kənd sakini 1962-ci il təvəllüdlü Rauf Hümbətovdur.

Xəsarət alanlar isə Mahir Rzayev, Vasif Zeynalov, Nəsimi Abdıyev, Ramiz Məmmədov, Fatimə Məmmədovadır. Onlar hər biri Tovuz rayon Mərkəzi Xəstəxanasına yerləşdiriliblər.

Əzizə İsmayılova

15:38

Tovuzda ölümlə nəticələnən ağır avtomobil qəzası olub.

Oxu.Az APA-a istinadla xəbər verir ki, hadisə rayonun İbrahimhacılı kəndi ərazisində qeydə alınıb.

Hərəkətdə olan iki VAZ-2106 markalı minik maşını toqquşub.

Qəza zamanı bir nəfər ölüb, bir neçə nəfər isə xəsarət alaraq xəstəxanaya yerləşdirilib.