Mərhum Xalq artisti Ramiz Əzizbəylinin kürəkəni həbs edilib.
Oxu.Az-ın əldə etdiyi məlumata görə, polis əməkdaşlarının keçirdikləri tədbirlərlə külli miqdarda dələduzluqda təqsirləndirilən Rüfət Qasımzadə və Məmməd Məmmədzadə saxlanılıblar.
Nəsimi Rayon Polis İdarəsində hər iki şəxs barədə Cinayət Məcəlləsinin 178.3.2-ci (külli miqdarda törədilməklə dələduzluq) maddəsi ilə cinayət işi başlanılıb, iş Nəsimi Rayon Prokurorluğuna verilib.
Faktla bağlı hər iki şəxs barəsində həbs qətimkan tədbirinin seçilməsi ilə bağlı Nəsimi Rayon Məhkəməsində istintaq orqanının təqdimatına baxılıb. Məhkəmənin qərarı ilə istintaq orqanının təqdimatı təmin edilib və hər iki şəxs barəsində həbs qətimkan tədbiri seçilib.
Xatırladaq ki, iş üzrə 4 zərərçəkmiş tanınıb. İttihama görə, təqsirləndirilən şəxslər Ə.Allahverdiyevin 317 min manatını, E.Mahmudbəylinin 66 500 ABŞ dollarını (113 050 manat), E.Seyidovun 143 min ABŞ dollarını (243 min 100 manat), M.Cəfərovun isə 50 600 ABŞ dollarını (86 020 manat) dələduzluqla ələ keçirməkdə ittiham olunurlar. Təqsirləndirilən şəxslər qızıl alveri adı ilə zərərçəkmişlərin etibarından sui-istifadə edərək onların külli miqdarda vəsaitlərini mənimsəməkdə ittiham olunurlar. Onlar ümumilikdə 759 min 170 manat dələduzluqda təqdirləndirilirlər.
Məlumata görə, təqsirləndirilən Rüfət Qasımzadə Xalq artisti, məhrum aktyor Ramiz Əzizbəylinin kürəkəni, eyni zamanda bacısının oğludur.
