Zaqatala rayonunda baş verən yol-nəqliyyat hadisəsi zamanı xəsarət alanların vəziyyəti açıqlanıb.
Oxu.Az-a Tibbi Ərazi Bölmələrini İdarəetmə Birliyindən (TƏBİB) verilən məlumatda bildirilib ki, iyulun 6-da, saat 01:20-də Zaqatala rayonu ərazisində baş vermiş yol-nəqliyyat hadisəsi nəticəsində xəsarət alan dörd nəfər (üçü kişi, biri qadın) Zaqatala Rayon Mərkəzi Xəstəxanasının II Təcili tibbi yardım şöbəsinə hospitalizasiya olunub.
"Bədənin müxtəlif nahiyələrinin açıq yarası, əziyi diaqnozları təyin olunan şəxslərin hər birinə zəruri tibbi xidmətlər göstərilib. Vəziyyətləri qənaətbəxş qiymətləndirilən iki nəfərin müalicəsi Təcili tibbi yardım şöbəsində, vəziyyəti orta ağır qiymətləndirilən bir nəfərin müalicəsi isə Cərrahiyyə şöbəsində davam etdirilir. Vəziyyəti ağır qiymətləndirilən 1985-ci il təvəllüdlü şəxsə (kişi) isə zəruri reanimasiya tədbirlərinin göstərilməsinə baxmayaraq, saat 01:32-də bioloji ölüm faktı qeydə alınıb", - deyə məlumatda vurğulanıb.
Əzizə İsmayılova
Bu gün gecə saat 2 radələrində Zaqatala şəhəri ərazisində "Tofaş" və BMW markalı avtomobillər toqquşub.
Oxu.Az-ın məlumatına görə, nəticədə "Tofaş"ın sürücüsü, 41 yaşlı Orxan Orucov xəstəxanada ölüb, digər nəqliyyat vasitəsinin sürücüsü, 30 yaşlı Əhməd Camalov xəsarət alıb.
Daxili İşlər Nazirliyinin Mətbuat Xidmətinin regional qrupundan bildirilib ki, faktla bağlı cinayət işi başlanılıb, araşdırmalar aparılır.
