Londonun "Arsenal" klubu transfer bazarında fəallığını artıraraq "Leypziq"in mərkəz müdafiəçisi Kastello Lukeba ilə rəsmi danışıqlara start verib.
Oxu.Az "L'Equipe" nəşrinə istinadən xəbər verir ki, fransalı istedadlı futbolçu üç mövsümdən sonra Almaniya təmsilçisi ilə yollarını ayırmaq qərarına gəlib.
Bildirilib ki, "Leypziq" rəhbərliyi 23 yaşlı oyunçusunun keçidi müqabilində 60-70 milyon avro məbləğində transfer haqqı tələb edir. "Arsenal"ın skautları artıq hərəkətə keçib və fevralın 21-də Bundesliqada "Borussiya Dortmund"la baş tutan (2:2) gərgin matçda Lukebanın çıxışını canlı izləyiblər. Müdafiəçinin özü isə peşəkar karyerasını İngiltərə və ya İspaniya çempionatlarında davam etdirməkdə maraqlıdır.
Xatırladaq ki, Lukeba cari mövsümdə iştirak etdiyi bütün turnirlərdə ümumilikdə 23 dəfə start heyətdə yer alıb. Onun aktivində bir qol və bir məhsuldar ötürmə var. Futbolçunun Almaniya klubu ilə mövcud müqaviləsinin müddəti isə 2029-cu ilin yayına qədər nəzərdə tutulub.
