Avroliqanın finalı “Qarabağ”ın oynayacağı stadionda

Çempionlar Liqası və Avropa Liqasının finallarının qarşıdakı mövsümlərdə hansı şəhərlərdə oynanılacağı açıqlanıb.

Oxu.Az xəbər verir ki, bu barədə UEFA-nın rəsmi saytı məlumat yayıb.

UEFA İcraiyyə Komitəsinin Lyublyanada baş tutan iclasından sonra verilən qərara görə, 2021, 2022 və 2023-cü illərdəki ÇL finallarının keçiriləcəyi arenalar müəyyənləşib.

Qitənin ən nüfuzlu klub turniri olan Çempionlar Liqasının 2021-ci ildəki finalı Rusiyanın Sankt-Peterburq şəhərindəki eyniadlı stadionda baş tutacaq.

2022-ci ilin ÇL finalına Münhenin “Alyans Arena” stadionu ev sahibliyi edəcək.

2023-cü ildə isə ÇL-in həlledici qarşılaşması Londondakı “Uembli” stadionunda keçiriləcək.

UEFA 2021-ci ildə Avropa Liqasının final matçının keçiriləcəyi arenanı da açıqlayıb. Həmin qarşılaşma İspaniyanın “Sevilya” klubunun ev oyunlarını keçirdiyi “Ramon Sançes-Pisxuan” stadionunda baş tutacaq.

Qeyd edək ki, “Sevilya” hazırda davam edən mövsüm Avropa Liqasının qrup mərhələsində təmsilçimiz “Qarabağ”la eyni qrupda yer alıb və iki komanda arasındakı cavab matçı “Ramon Sançes-Pisxuan”da baş tutacaq.