Change.org platformasının istifadəçiləri Asturiya Şahzadəsi Fondundan Lionel Messiyə idman sahəsində mükafatın verilməsi qərarına yenidən baxılmasını tələb edən 30-a yaxın petisiya yaradıblar. Müraciət müəllifləri Argentina millisinin kapitanına təqdim edilən mükafatın ləğv olunmasına, geri alınmasına və ya yenidən qiymətləndirilməsinə çağırış edirlər.
Oxu.Az xəbər verir ki, bu barədə COPE nəşri informasiya yayıb.
Sözügedən petisiyalar İspaniya və Argentina arasında baş tutan dünya çempionatının (DÇ-2026) finalından sonra meydana çıxıb.
Təşəbbüskarlar hesab edirlər ki, Messinin turnir ərzindəki hərəkətləri "qeyri-idman xarakterli olmaqla yanaşı, hörmət dəyərlərinə ziddir".
Şikayətlərdə əlavə vaxtda Ferran Torresin vurduğu qol sayəsində İspaniyanın 1:0 hesabı ilə qalib gəldiyi həlledici matç zamanı argentinalı futbolçunun reaksiyası, eləcə də ondan sonra keçirilən mükafatlandırma mərasimindəki davranışı xüsusi qeyd olunur.
Bundan əlavə, istifadəçilər kubokun təqdimatı prosesində Argentina nümayəndə heyətinin bəzi üzvlərinin hərəkətlərinə və qarşılaşma bitdikdən sonra baş verən insidentlərə də diqqət çəkiblər.
Qeyd edək ki, iyunun 3-də Lionel Messi 2026-cı il idman üzrə "Asturiya şahzadəsi" mükafatının qalibi elan edilmişdi. Həmin vaxt münsiflər heyəti onun idman karyerasını, xeyriyyəçilik fəaliyyətini, meydandakı nümunəvi davranışını, həmçinin sabitliyini, təvazökarlığını və komanda oyununa sadiqliyini yüksək qiymətləndirmişdi. Mükafatın rəsmi təqdimat mərasiminin oktyabr ayında keçirilməsi planlaşdırılır.
