Azərbaycanın “Azəryol” voleybol klubunun rəsmi nümayəndəsi Zöhrab Gözəlbəyli klubun formasındakı rənglərlə bağlı açıqlama verib.
Oxu.Az xəbər verir ki, “Axar.az”a açıqlamasında Z.Gözəlbəyli kluba qarşı yönəlmiş ittihamları xüsusi kampaniya adlandırıb.
“Tamamilə əsassız ittihamdır. Burda rənglər arasında fərq var, üstəlik bizim formamızda beş rəng var və sonuncu rəng boz rəngdir. Yəni bu, mənasız söhbətlərdir. Jurnalistlər sensasiya xatirinə belə mənasız məsələləri gündəmə gətirirlər. Onlar “Azəryol”un uğurları haqda məlumat vermirlər, amma belə mənasız söhbətlərə qaçırlar. “Azəryol” Azərbaycan voleybolunun inkişafı uğrunda çalışır və bizi bədnam düşmənlərimizə bənzətmək əsassızdır” – deyə, o, bildirib.
Qeyd edək ki, bundan əvvəl mətbuatda “Azəryol” voleybol klubunun formasındakı rənglərin Ermənistanın bayrağındakı rəngləri təkrarlaması barədə məlumat yayılmışdı.
