Bakıda taekvondo üzrə dünya çempionatı start götürür

Bu gün Bakıda taekvondo üzrə 26-cı dünya çempionatı start götürəcək.

İyunun 4-dək davam edəcək mundialda 145 ölkədən 949 idmançı qüvvəsini sınayacaq.

Bu taekvondoçular yarışda 16 dəst medal uğrunda mübarizə aparacaqlar. “Öz gücünü alovlandır” şüarı altında təşkil olunacaq mundial Dünya Taekvondosunun 50 illiyinə və Ümummilli Lider Heydər Əliyevin 100 illiyinə təsadüf edəcək. Yarışda ümumilikdə 150-dən çox ölkədən 2000-ə yaxın qonaq ölkəmizə gəlib. Dünya çempionu olacaq idmançı aktivinə 140 reytinq xalı əlavə edəcək.

Çempionatda Azərbaycanı Səyyad Dadaşov (54 kq), Qaşım Maqomedov (58 kq), Xanoğlan Kərimov (63 kq), Cavad Ağayev (68 kq), Eltac Qafarov (74 kq), Əliəskər Əliyev (80 kq), Taleh Süleymanov (87 kq), Həmidrza Bədriəliabadi (+87 kq), Minayə Əkbərova (46 kq), Patimat Abakorava (49 kq), Səmərrux Osmanova (53 kq), Fatimə Məcidova (62 kq) və Fəridə Əzizova (67 kq) təmsil edəcəklər.

Yarışın ilk günündə 2 çəki dərəcəsində qaliblər bəlli olacaq. Kişilərdə 68 kq, qadınlarda 57 kq çəkidə mükafatçılar müəyyənləşəcək. Azərbaycan millisinin heyətində Cavad Ağayev dayanq üzərinə çıxacaq. O, 1/32 final mərhələsində Solomon Tefera (Efiopiya) - Eldar Kurmanaliyev (Qırğızıstan) cütünün qalibi ilə döyüşəcək. Bakı Kristal Zalında keçiriləcək döyüşlər saat 09:00-da, yarımfinal görüşləri saat 18:30-da başlayacaq. Mundialın rəsmi açılış mərasimi isə saat 16:30-da start götürəcək.

Qeyd edək ki, dünya çempionatı Rusiyadan sonra MDB ölkələri arasında ikinci dəfə Azərbaycanda olacaq. Ölkəmiz mundialı qəbul edəcək Avropa ölkələri arasında Almaniya, Danimarka, İspaniya, Yunanıstan, Rusiya və Böyük Britaniyadan sonra yeddinci kimi tarixə düşəcək.