Azərbaycan Motosiklet İdmanı Federasiyasının (AMİF) təşkilatçılığı ilə 8 Noyabr - Zəfər Gününə həsr olunan motokross çempionatı keçirilib.
Oxu.Az xəbər verir ki, kişilər arasında 250 sm3 və 450 sm3 həcmli motosikletlərdə motokross üzrə 16 idmançı iştirak edib.
Gərgin keçən mübarizədən sonra 250 sm3 həcmli motosikletlərdə 1-ci yerə Camal Babayev, 2-ci yerə Şahin Ağasıyev, 3-cü yerə Emin Tağıyev, 450 sm3 həcmli motosikletlərdə isə 1-ci yerə Vaqif Əhmədov, 2-ci yerə Sahil Mustafayev, 3-cü yerə Rafiq Mirzəcanov layiq görülüblər.
Yarışda I, II və III yerləri tutmuş idmançılar Azərbaycan Motosiklet İdmanı Federasiyası tərəfindən müvafiq dərəcəli diplomlarla, medallarla və xatirə hədiyyələri ilə təltif olunublar.
Azərbaycan Motosiklet İdmanı Federasiyasının (AMİF) təşkilatçılığı ilə 8 Noyabr - Zəfər Gününə həsr olunan motokross çempionatı keçirilir.
Oxu.Az xəbər verir ki, tədbirin əsas məqsədi Azərbaycanda motoidmanın inkişafına dəstək olmaq, gənclər arasında idmana marağı artırmaq, həmçinin Vətən uğrunda canından keçən qəhrəmanların əziz xatirəsini yad etməkdir.
Azərbaycan Motosiklet İdmanı Federasiyasının prezidenti Fuad Bağırov bildirib ki, bu çempionat təkcə idman tədbiri deyil:
"Bu, qəhrəmanlarımıza ehtiram və gənc nəslə ruh, cəsarət və vətənpərvərlik aşılayan bir simvoldur. Bütün motoidman həvəskarlarını və vətəndaşlarımızı bu günü bizimlə birlikdə keçirməyə dəvət edirik".
Çempionatda ölkənin ən güclü motokross idmançıları ilə yanaşı, Azərbaycanın müxtəlif bölgələrindən dəvət olunmuş pilotlar da iştirak edirlər. Tamaşaçılar həyəcanlı mərhələlər, nümunəvi çıxışlar, motoşou və motosiklet sərgilərinə şahidlik edəcəklər.
Qeyd edək ki, ənənəvi xarakter daşıyacaq motokross çempionatının növbəti illərdə də Zəfər Gününə həsr olunmaqla silsilə şəkildə keçirilməsi planlaşdırılır.
Daha çox foto burada: PhotoStock.az
Murad Nəsimi
