Azərbaycan kuboku: "Qarabağ"ın finalda rəqibi "Sabah" oldu

Futbol üzrə Azərbaycan Kubokunda sonuncu finalçı müəyyənləşib.

Oxu.Az xəbər verir ki, bu yarımfinal mərhələsinin "Sabah"la "Neftçi" arasında baş tutan cavab matçından sonra bəlli olub.

"Bank Respublika Arena"da keçirilən qarşılaşma 1:1 hesabı ilə yekunlaşıb. "Sabah"ın heyətində 23-cü dəqiqədə Cesse Sekidika fərqlənib. "Neftçi"dən isə Emin Mahmudov 40-cı dəqiqədə rəqib qapısına yol tapıb.

Beləliklə, iki oyunun nəticəsinə görə finala vəsiqə qazanan tərəf "Sabah" (2:1, 1:1) olub. Vasili Berezutskinin rəhbərlik etdiyi komanda mövsümün son matçında "Qarabağ"la üz-üzə gələcək.

Qeyd edək ki, Azərbaycan Kubokunun final matçı mayın 31-də Mehdi Hüseynzadə adına Sumqayıt şəhər stadionunda keçiriləcək.

19:18

Futbol üzrə Azərbaycan Kubokunda "Araz-Naxçıvan"a qalib gələn "Qarabağ" finala yüksəlib.

Oxu.Az xəbər verir ki, Tofiq Bəhramov adına Respublika stadionunda baş tutan yarımfinal mərhələsinin cavab oyununda Ağdam təmsilçisi 3:0 hesablı qələbəyə sevinib.

"Köhlən atlar"ın heyətində Yassin Benzia (65) Nəriman Axundzadə (70) və Toral Bayramov (77-p) fərqləniblər.

Tərəflər arasında ilk matçda Naxçıvan təmsilçisi qələbə qazanmışdı- 1:0.

09:48

Futbol üzrə Azərbaycan Kubokunda finalçılar bu gün müəyyənləşəcək.

Oxu.Az xəbər verir ki, yarımfinal mərhələsinin cavab oyununda "Qarabağ" "Araz-Naxçıvan"la üz-üzə gələcək.

Qarşılaşma Tofiq Bəhramov adına Respublika stadionunda, saat 17:00-da start götürəcək. İlk matçda Naxçıvan təmsilçisi qalib gəlib - 1:0.

Digər görüşdə isə "Neftçi" "Sabah"ın qonağı olacaq. Oyun saat 20:00-da başlayacaq. "Ağ-qaralar" daha əvvəl evdə 1:2 hesabı ilə uduzub.

Azərbaycan Kuboku

Yarımfinal, cavab oyunları

23 aprel

17:00. "Qarabağ" - "Araz-Naxçıvan"

Hakimlər: Rəvan Həmzəzadə, Cəmil Quliyev, Şirmamed Mamedov, Əliyar Ağayev.

VAR: Kamal Umudlu.

AVAR: Rauf Cabarov.

Hakim-inspektor: Vüsal Əliyev.

AFFA nümayəndəsi: Elgiz Abbasov.

Tofiq Bəhramov adına Respublika stadionu

İlk oyun - 0:1.

20:00. "Sabah" - "Neftçi"

Hakimlər: İnqilab Məmmədov, Namiq Hüseynov, Rahil Ramazanov, Fərid Hacıyev.

VAR: Nicat İsmayıllı.

AVAR: Tural Qurbanov.

Hakim-inspektor: Babək Quliyev.

AFFA nümayəndəsi: Seymur Səlimli.

"Bank Respublika Arena"

İlk oyun - 2:1.

Qeyd edək ki, Azərbaycan Kubokunun final oyunu mayın 31-də Mehdi Hüseynzadə adına Sumqayıt şəhər stadionunda keçiriləcək.