"Mən Qazaxıstanlı döyüşçülərə hörmət edirəm".
Oxu.Az xəbər verir ki, bunu "UFC Fight Night"da qazaxıstanlı döyüşçü Asu Almabayevlə qarşılaşacaq ABŞ-dən olan Çarlz Conson deyib.
O bildirib ki, Asu çox gözəl döyüşçüdür:
"O, dünyanın hər yerində tanınır. Qazaxıstanlı döyüşçülərə rəğbətim var. Qazaxıstandan olan idmançılarla çox qarşılaşmışam, amma bu döyüş, xüsusilə, fərqli olacaq. Mənim peşəkar boksla məşğul olmağım UFC döyüşlərində mənə çox da kömək olmur. Nəzərə almaq lazımdır ki, mənim boksla bağlı fəaliyyətim 21 yaşımda, yəni keçmişdə olub. Əslinə qalsa, mən təkcə boksla deyil, Tailandda muay-tayla da məşğul olmuşam. Buna görə də rəqibləri nokaut etməyə hazıram".
"Azərbaycanda olduğum müddətcə yeməklərinizin dadına baxa bilməmişəm. Çünki döyüşə hazırlaşıram və xüsusi yeməklər yeyirəm. Amma döyüşdən sonra çalışacağam ki, nəsə tapıb yeyim. İnsanlarınız çox gözəl və baxımlıdırlar. Bakıda hər yer çox səliqəli və təmizdir", - deyə Ç.Conson qeyd edib.
Xatırladaq ki, bu il "UFC Fight Night" iyunun 27-də Milli Gimnastika Arenasında baş tutacaq. Gecənin əsas döyüşündə azərbaycanlı təmsilçi Rafael Fiziyev yüngül çəki dərəcəsində Manuel Torreslə üz-üzə gələcək. İkinci əsas döyüşdə isə orta çəki dərəcəsində Şarabutdin "Shara Bullet" Maqomedov Mişel Pereyra ilə qarşılaşacaq.
Turnir çərçivəsində digər azərbaycanlı döyüşçülər - Tahir Abdullayev, Nazim Sadıxov və Fərman Həsənov da oktaqona çıxacaqlar. Onlar müvafiq olaraq braziliyalı Ceferson Nasimento, braziliyalı Mateus Kamilo və ABŞ-li Erik Nolanla döyüşəcəklər.
