İngiltərənin "Çelsi" klubu UEFA Çempionlar Liqasının əsas mərhələsindəki rəqibləri ilə bağlı paylaşım edib.
Oxu.Az xəbər verir ki, bu barədə London təmsilçisinin mətbuat xidməti məlumat yayıb.
"Zadəganlar" Liqa mərhələsində üz-üzə gələcəyi komandaları göstərməklə yanaşı hər komandadan bir futbolçunu seçib.
Premyer Liqa klubunun "Qarabağ"dan seçdiyi oyunçu isə ukraynalı Aleksey Kaşuk olub.
"Çelsi"nin rəsmi saytında, həmçinin geniş məqalə dərc olunub. Orada klub azarkeşlərə qrup mərhələsindəki rəqiblərlə əvvəlki görüşləri xatırladıb. Xüsusi diqqət 2017/18 mövsümünün Çempionlar Liqasının qrup mərhələsində Bakıda baş tutmuş və londonluların 4:0 hesablı qələbəsi ilə başa çatan "Qarabağ"la oyuna ayrılıb.
"Bu oyun bəlkə də siyahımızdakı digər görüşlər qədər məşhur deyil, amma 6 000 millik yolu qət edib Azərbaycana gələn və geri dönən azarkeşlər həmin axşamı yəqin ki, hər zaman xoş xatırlayacaqlar", - deyə yazıda qeyd olunub.
Məqalədə həmin yaddaqalan oyunun gedişi də ətraflı təsvir olunub: "Eden Hazard penalti ilə hesabı açdı. Buna səbəb isə Rəşad Sadıqovun Villiana qarşı qayda pozuntusu idi ki, o da qırmızı vərəqə ilə cəzalandırıldı. Ardınca bizim parlaq belçikalımız yaradıcılıq göstərərək, topu topuğuyla Villiana ötürdü və braziliyalı futbolçu fasiləyə 10 dəqiqə qalmış ikinci qolu vurdu. Oyunun bitməsinə 17 dəqiqə qalmış Sesk Fabreqas da Villianın qazandırdığı ikinci penalti zərbəsini dəqiq yerinə yetirdi. Sonra isə braziliyalı vinger cərimə meydançasının kənarından dəqiq zərbə ilə oyunu tamamladı. Bu qələbə "Çelsi"yə pley-off mərhələsinə vəsiqə qazandırdı və hər kəsin evinə xoşbəxt şəkildə dönməsini təmin etdi".
