Çempionlar Liqası: "Lill" ilə bacarmayan "Fənərbağça" turnirlə vidalaşdı

Türkiyənin "Fənərbağça" klubu UEFA Çempionlar Liqasının III təsnifat mərhələsinin cavab oyunu çərçivəsində Fransanın "Lill" komandası ilə qarşılaşıb.

Oxu.Az xəbər verir ki, İstanbulda baş tutan matçda hesab yalnız 90+1-ci dəqiqədə avtoqolla açılıb.

"Lill"in futbolçusu topu öz qapısına göndərərək "Fənər"i əsas vaxtda məğlubiyyətdən xilas edib - 1:0.

Fransadakı ilk oyunda yerli komanda 2:1 hesabı ilə qalib gəldiyindən ümumi hesab 2:2 olub və əlavə vaxta ehtiyac yaranıb. Matçın 109-cu dəqiqəsində "Lill" azlıqda qalıb.

Buna baxmayaraq əlavə vaxtın son dəqiqələrində qonaqlar penaltidən hesabı bərabərləşdirərək sevinən tərəf olublar - 1:1 (2:3).

Turnirlə vidalaşan sarı-lacivərdlər isə yollarına Avropa Liqasında davam edəcəklər.