Çempionlar Liqası: "Qarabağ"ın məğlubiyyətinin arxasındakı SƏBƏB

Anar Həsənov yazır...

UEFA Çempionlar Liqasının III təsnifat mərhələsinin ilk görüşünü doğma divarlar arxasında "Ludoqorets"ə qarşı keçirən "Qarabağ" bu dəfə etimadı doğrulda bilmədi. Bunun səbəbini isə uzaqda axtarmağa ehtiyac yoxdur.

Belə ki, ilk hissədə bütün üstünlüyü ələ alan, rəqib komandaya göz açdırmayan "Qarabağ" fasilədən sonra sanki geri çəkilmək məcburiyyətindəymiş kimi oyun nümayiş etdirdi. Hərçənd ki, "köhlən atlar"ın müdafiə xarakterli oyun oynaya bilməməsi nəinki azarkeşlərə, bütün rəqiblərinə də bəllidir. Təcrübəli mütəxəssis Qurban Qurbanovun dəyişiklikləri istər azarkeşlərin, istərsə də idman ictimaiyyətinin təəccübünə səbəb oldu.

Hansı ki, ilk dəqiqələrdən etibarən uğurlu ötürmələr və oyuna qoşulmalarla komandanın döyünən ürəyinə çevrilən Toral Bayramov Elvin Cəfərquliyevlə əvəzləndi. Bu dəyişikliyin səbəbi bəlkə də Elvin Cəfərquliyevin sürəti hesabına hücumlara cəld çıxa bilməsi idi. Amma nəticəyə baxsaq, bu əvəzetmənin komandanın əleyhinə olduğunu görə bilərik. Elvin Cəfərquliyevin hər oyunda qırmızı vərəqə alaraq meydanı tərk etməsi, eyni zamanda əsəblərini cilovlaya bilməməsi onun psixoloji olaraq bu görüşə də hazır olmadığını göstərirdi. Qapıçı mövqeyində xətaların olmaması ümidverici idi. Fabian Buntiçin seyvləri komandaya özgüvən qazandırsa da, sanki rəqib "Qarabağ"ın müdafiəsində bizim görə bilmədiyimiz boşluqları analiz edə bilmişdi.

"Ludoqorets"in baş məşqçisi də mətbuat konfransında "Qarabağ"ın boşluqlar verdiyini tez-tez dilə gətirirdi. Qurban Qurbanov isə, məncə, hazırkı heyətdən məmnun deyil. "Qarabağ"ın ehtiyat oyunçular skamyasının kasad olduğuna bir daha şahidlik etmək çətin deyildi. Veşoviç fasiləyə qədər bütün gücünü istifadə etdiyindən faydalı iş əmsalı minimuma enmişdi, ancaq onun yerinə çıxan Mateus Silva da heç nə ilə yadda qala bilmədi. Hücumçuların arxasında da əvəzetmədən girib oyunu dəyişəcək biri yox idi, ona görə də Qurban Qurbanov Keytanı cinaha, Leandronu mərkəzə çəkdi. Komandada yaranan boşluqlar çətinliklə də olsa, turu keçəcəyimiz təqdirdə doldurulmalıdır. Təcrübəli mütəxəssis isə hər mətbuat konfransında yeni futbolçu transfer etmək istədiklərini, amma alınmadığını dilə gətirir.

Bəli, razılaşmaq lazımdır ki, "Qarabağ" Bolqarıstan klubları ilə görüşdə hər zaman çətinliklə üzləşir. Düşünsək ki, rəqib oynamırdı, yox, lazım olanda oynayırdı, lazım olanda da qol vurmağı bacardılar. Qurban Qurbanovun komandanı oynatmadığını düşünsək, o zaman ağdamlılar bu qədər epizoda necə girdilər? Nə ondandır, nə bundan, ya da həm ondandır, həm də bundan. Çox çətin rəqibdir və bu dəfə iş futbolçulara yox, baş məşqçiyə düşəcək. Bu çətin məsələni çözməli, uzun illərdir azarkeşlərin etimadını lazımından artıq doğruldan "Qarabağ"a qələbə qazandırmağa çalışmalıdır Qurban Qurbanov.

"Ludoqorets"in görüşə düzgün formada başlaması və doğru analizi Bolqarıstan klubuna qələbə qazandırdı. "Qarabağ" kimi komandalarının oyununu pozmağın ən doğru yolu aqressiv, kobudluğa yaxın dərəcədə oynamaq, maksimum kontaktla özünü hiss etdirməkdir. Bəli, belə anlarda hakimin buna imkan verməsi, epizodlara göz yumması lazımdır ki, məhz belə də oldu. Qurban Qurbanovun referilər ilə bağlı dediklərinə isə haqq vermək olar. Təcrübəli baş məşqçi hakimlərin rəqib komandaya simpatiyası olduğunu dilə gətirmişdi. Sanki, nəinki "Qarabağ" Azərbaycan klublarının hər birinin Avrokuboklarda keçirdiyi matçlara təyinat alan hakimlərin hər birinin rəqibə qarşı simpatiyası olur. İlk hissədə ən azı bir qırmızı və bir neçə sarı vərəqə verilə bilərdi rəqibə.

Problemlərə baxmayaraq, "Qarabağ" çox sayda qol epizodu da əldə etdi və qaçırdı. Real şansları bu qədər rahat sağa-sola xərcləyəndə, "vurmayana vurarlar" prinsipi mütləq işə düşməli idi. Rəqibin cərimə meydançasının içində düşən imkanları reallaşdırmaq üçün sadə həllər lazım idi, biz isə uzatmağa, daha bir neçə toxunuş edərək zərbə vurmağa çalışırdıq. Bu vaxtda isə rəqib mövqeyini tutur, boşluqları doldururdu.

Haqlı məğlubiyyət idi. "Ludoqorets" keçilməz deyil. Cavab matçında daha riskli oynamalı, daha sürətli qərarlar verməyə çalışmaq lazımdır. Cavab matçında sürət və çeviklik həlledici olacaq. Qıvraq davranan, hər epizoda ciddi yanaşan qalib gələcək. İnanaq ki, sevinən tərəf "Qarabağ" olacaq.