ÇL: "Real"dan darmadağın, "Bavariya"dan sürpriz nəticə

UEFA Çempionlar Liqasının liqa mərhələsində VII tura yekun vurulub.

Oxu.Az xəbər verir ki, son oyun günündə "Real Madrid" "Zalsburq"u sınağa çəkib.

Rəqibin qapısından 5 qol keçirən kral klubu öz qapısında cəmi bir top görüb - 5:1.

Turun maraqlı qarşılaşmalarından biri Niderlandda baş tutub. "Feyenoord" "Bavariya"nı qəbul edib. Görüş gözlənilməz nəticə ilə başa çatıb. Belə ki, almanlar meydan sahiblərinə 3:0 hesabı ilə məğlub olublar.

"Arsenal" Londonda "Dinamo Zaqreb"in qapısından 3 cavabsız top keçirib - 3:0. Görüşdə hesabı artıq 2-ci dəqiqədə açan "topçular" son nöqtəni 90+1-ci dəqiqədə qoyublar.

"Sparta Praqa"nın qonağı olan "İnter" minimal hesabla qələbə qazanıb - 0:1. Yeganə qolu 12-ci dəqiqədə Lautaro Martinez vurub.

Eyni hesabla "Milan" San Siroda "Jirona"dan üstün olub. Rafael Lyaonun 37-ci dəqiqədəki məhsuldar zərbəsi komandasına 3 xal qazandırıb - 1:0.

"Seltik" "Yanq Boyz"u minimal fərqlə (1:0), "Şaxtyor Donetsk" isə "Brest"i 2:0 hesabı ilə məğlub edib.