"Əsas bayram yarışlarda qalib gələrkən olur" - Çempionlarımızdan Novruz təbriki

"Novruzu Gəncədə ailəmlə qeyd edəcəyəm. Bu bayramda ən sevdiyim adət qonşularla tonqalın ətrafında yığışıb oynamaqdır".

Bunu Oxu.Az-a açıqlamasında paralimpiya çempionumuz İmaməddin Xəlilov deyib.

"Xalqımızı bu Novruz bayramı münasibətilə təbrik edirəm. Süfrənizə ruzi, qəlbinizə xoş hisslər gətirsin. Sağlamlığınız möhkəm və daimi, ümidləriniz gerçək olsun", - deyə Paris-2024-ün qızıl medalçısı arzularını dilə gətirib.

2016-cı il Yay Olimpiya Oyunlarının bürünc mükafatçısı Rəsul Çunayev Novruz bayramının xalqımıza düşərli olmasını arzulayıb:

"Bu Novruz bütün xalqımıza, millətimizə düşərli olsun. Bütün dərdlər unudulsun getsin, üzlərdə təbəssüm, ürəklərdə sevinc bol olsun. Qədəmləri uğurlu, könül oxşayacaq sevincli günləri bol olsun. Baharın gəlişini, təbiətin oyanışını müjdələyən, ümid dolu başlanğıcların, bolluq və bərəkətin simvolu olan, bol ruzi dolu bayram diləyi ilə hər kəsin bayramını təbrik edirəm".

Dünya karatesinin "Qara brilyant"ı Rafael Ağayev də Oxu.Az vasitəsilə bayram təbrikini çatdırıb:

"Qoy bu təravətli Novruz bayramı süfrənizi ruzi, qəlbinizi isə xoş hisslərlə doldursun. Sağlamlığınız möhkəm, arzularınız sonsuz, ümidləriniz gerçək olsun! Novruz bayramınız mübarək!".

"Neftçi" klubunun futbolçusu Elvin Camalov Oxu.Az-a açıqlamasında bildirib ki, bayramda paytaxtdan ayrılmaq fikri yoxdur:

"Bütün Azərbaycan xalqını və futbol ictimaiyyətini Novruz bayramı münasibətilə səmimi-qəlbdən təbrik edirəm. Ölkəmizə daim mehribanlıq, sülh, bütün evlərə bol ruzi-bərəkət arzulayıram! Birlik, bərabərlik dolu, gözəl, xoşbəxt bir il diləyirəm. Novruz bayramınız mübarək! Mən bu bayramı milli komanda üzvləri ilə Bakıda, düşərgədə qeyd edəcəyəm".

Paris-2024 Yay Olimpiya Oyunlarının mükafatçısı Həsrət Cəfərov Oxu.Az-a açıqlamasında bildirib ki, tətil vaxtı məşqlərindən qalmayacaq:

"Əziz həmvətənlərim! Sizi Novruz bayramı münasibətilə ürəkdən təbrik edirəm! Bu bayram yeniliyin, ümidin və birliyin rəmzidir. Qoy bayram ocağınız daim alovlu, süfrəniz bərəkətli, qəlbiniz sevinc və xoşbəxtliklə dolu olsun! İdmanda olduğu kimi, həyatda da əsas olan iradə və əzmkarlıqdır. Arzu edirəm ki, hər biriniz bu Novruzda yeni qələbələrə doğru addımlayasınız, arzularınıza çatasınız! Vətənimiz hər zaman güclü və qalib olsun! Biz idmançıların əsas bayramları yarışlarda qalib gələrkən olur. Xalqımıza daha çox qələbə bəxş etmək və bayrağımızı yüksəltmək üçün məşqlər səbəbindən Bakıda olacağam".

Anar Həsənov