FIFA ilin ən yaxşılarını açıqladı

"Real Madrid"in vingeri Vinisius Junior 2024-cü ilin ən yaxşı futbolçusu seçilib. O, Dohada keçirilən mərasimdə FİFA-nın "The Best" mükafatına layiq görülüb.

Oxu.Az xəbər verir ki, bu barədə Championat.com məlumat yayıb.

Həmçinin "Kral klubu"nun çalışdırıcısı Karlo Ançelotti ilin ən yaxşı baş məşqçisi adını qazanıb.

İlin qapıçısı "Aston Villa"nın və Argentina millisinin qolkiperi Emiliano Martinez olub.

"Ferents Puşkaş" adına mükafata isə "Mançester Yunayted"in futbolçusu Alexandro Qarnaço layiq görülüb. Onun "Everton"a akrobatik tullanışla vurduğu qol ilin ən gözəl qolu seçilib.

Bununla yanaşı, FIFA ilin simvolik komandasını təqdim edib:

Qapıçı: Emiliano Martinez ("Aston Villa", Argentina);

Müdafiəçilər: Dani Karvaxal ("Real Madrid", İspaniya), Ruben Dias ("Mançester Siti", Portuqaliya), Uilyam Saliba ("Arsenal", Fransa), Antonio Rudiger ("Real Madrid", Almaniya);

Yarımmüdafiəçilər: Rodri ("Mançester Siti", İspaniya), Toni Kroos ("Real Madrid", Almaniya), Cude Bellinqem ("Real Madrid", İngiltərə);

Hücumçular: Lamin Yamal ("Barselona", ​​İspaniya), Erlinq Holand ("Mançester Siti", Norveç), Vinisius Junior ("Real Madrid", Braziliya).

16:12

Beynəlxalq Futbol Federasiyaları Assosiasiyası (FIFA) bu gün Qətərin paytaxtı Doha şəhərində 2024-cü ilin ən yaxşılarını mükafatlandıracaq.

Oxu.Az xəbər verir ki, mükafatlandırma mərasimində ilin ən yaxşı oyunçusu, qapıçısı, müdafiəçisi, yarımmüdafiəçisi, hücumçusu, baş məşqçisi bəlli olacaq.

Qeyd edək ki, bu gün ilin ən yaxşı qolu (Puşkaş) mükafatı da öz sahibini tapacaq.