"Formula-1": Ferstappen İtaliyada birinci oldu

"Red Bull" komandasının niderlandlı pilotu Maks Ferstappen "Formula-1" üzrə dünya çempionatının yeddinci mərhələsi olan Emilia-Romanya (İtaliya) Qran-prisinin qalibi olub.

Oxu.Az xəbər verir ki, bu, cari mövsümdə pilotun ikinci qələbəsi olub.

İkinci yeri "Maklaren"in britaniyalı pilotu Lando Norris tutub. Üçüncü isə onun komanda yoldaşı avstraliyalı Oskar Piastri olub.

Hazırda ümumi hesabda 146 xal toplayan Piastri liderliyini qoruyub saxlayır. İkinci yerdə 133 xalla Norris, üçüncü pillədə isə 124 xallı Ferstappen qərarlaşıb. Konstruktorlar kubokunda "Maklaren" 279 xalla birinci, "Mersedes" 147 xalla ikinci, "Red Bull" isə 131 xalla üçüncü yerdədir.

Qeyd edək ki, növbəti mərhələ mayın 23-25-də Monakoda keçiriləcək.