İspaniyanın "Sevilya" klubunun futbolçusu Sezar Aspilikueta karyerasını başa vurub.
Oxu.Az xəbər verir ki, 36 yaşlı müdafiəçi bu barədə sosial şəbəkə hesabında paylaşım edib.
O bu mövsümün peşəkar futbolçu kimi karyerasında sonuncu olacağını qeyd edib:
"Bu gün bu mövsümün peşəkar futbolçu kimi karyeramda sonuncu olacağını paylaşmaq istəyirəm. Uzun illər xəyalımı yaşadıqdan sonra həyatımda yeni bir səhifəyə başlamağın vaxtı gəldiyini hiss edirəm.
Bu ana özümü hazırlasam da, bu məktubu yazmaq mənim üçün asan olmadı. 20 mövsüm ərzində karyeramda bir çox insanın böyük rolu olub.
Pamplonada uşaq olarkən məktəb yoldaşlarımla top qovmağa başlayanda qarşıda məni bu qədər möhtəşəm bir səyahətin gözlədiyini xəyal belə edə bilməzdim. Qələbələrə, ağır məğlubiyyətlərə, çətinliklərə və ən əsası, bu yolda tanış olduğum insanlara, qazandığım dostluqlara görə hər an üçün minnətdaram.
Formasını geyindiyim "Osasuna", "Olimpik Marsel", "Çelsi", "Atletiko Madrid", "Sevilya" klublarındakı bütün komanda yoldaşlarıma, məşqçilərimə və heyətə, eləcə də ölkəmi ən böyük arenalarda təmsil etmək imkanına görə təşəkkür edirəm. Hər bir an mənim üçün çox dəyərli idi".
Xatırladaq ki, karyerasında uzun müddət İngiltərənin "Çelsi" klubunda çıxış edən futbolçu burada iki dəfə Premyer Liqanın, bir dəfə UEFA Çempionlar Liqasının qalibi olub.
