"Karyeramı Avropada davam etdirmək niyyətindəyəm".
Oxu.Az xəbər verir ki, bunu yanvarın 11-dən 17-dək Bakıda təlim-məşq toplanışında olacaq 21 yaşadək futbolçulardan ibarət Azərbaycan milli komandasının üzvü Həsən Nəzərli deyib.
Futbolçu Türkiyənin "Ankaragücü" klubundakı gələcəyinə aydınlıq gətirib:
"Bu yay "Ankaragücü" komandasından ayrılacağam. Səbəb legioner limiti ilə bağlıdır. Bir çox klublardan təkliflər var. Karyeramı Türkiyədə deyil, Avropada davam etdirmək niyyətindəyəm".
"Hazırlıq prosesi yaxşı keçir. Hədəfimiz qarşıdakı oyunlarda qələbə qazanmaqdır. Bunun üçün əlimizdən gələni edirik".
Qeyd edək ki, milli komandaların təlim-məşq mərkəzində təşkil olunacaq hazırlıq çərçivəsində U-21 iki yoxlama oyununda qüvvəsini sınayacaq. Yanvarın 16-da "Səbail", 17-də isə "Şamaxı" ilə qarşılaşmalar planlaşdırılıb. Toplanış üçün heyətə 24 futbolçu dəvət olunub.
Murad Nəsimi
