"Real Madrid" "Mançester Siti"nin yarımmüdafiəçisi Rodrinin əvəzinə bir neçə oyunçusunu təklif etməyə hazırdır.
Oxu.Az xəbər verir ki, belə bir iddialı məlumatı "Caught Offside" saytı paylaşıb.
Mənbənin məlumatına görə, Madrid klubu 29 yaşlı ispaniyalıya baş məşqçi Xabi Alonsonun taktiki sistemini gücləndirə biləcək əsas fiqur kimi baxır. Qeyd olunur ki, "Real" Rodrini almaq üçün müqaviləyə hücumçu Rodriqo və yarımmüdafiəçi Eduardo Kamavinqanı da daxil etməyə hazırdır. Bundan əlavə, Madrid komandası "Siti"yə daha 40 milyon avro ödəməyə hazırdır.
Rodri 2024-cü ildə "Qızıl top"un qalibidir. O, 2019-cu ildən Mançester klubunda çıxış edir. Bu müddət ərzində o, "Siti"nin heyətində 265 oyun keçirib, 26 qol vurub və 32 məhsuldar ötürmə edib. Yarımmüdafiəçinin hazırkı müqaviləsi 2027-ci ilin iyunun sonuna kimi nəzərdə tutulub. "Transfermarkt" portalı oyunçunun dəyərini 110 milyon avro qiymətləndirir.
