"Biz səfərdə çox yaxşı çıxış etdik".
Oxu.Az xəbər verir ki, bunu UEFA Çempionlar Liqasının III təsnifat mərhələsində keçiriləcək "Sabah" - "Orhus" oyunundan əvvəl keçirilən mətbuat konfransında Abşeron təmsilçisinin yarımmüdafiəçisi İvan Lepinitsa deyib.
O bildirib ki, rəqibin iki qol şansı oldu və ondan yararlandılar:
"Biz səfər oyununa yaxşı hazırlaşmışdıq. Ev oyununa daha da yaxşı hazırlaşmalıyıq. Səfərdə çox yaxşı çıxış etmişdik. Rəqibin iki dəfə uzaq məsafədən zərbəsi oldu və başqa real epizoda girmədilər. İnanırıq ki, mərhələni adlayan tərəf biz olacağıq.
Mənim üçün yarımmüdafiənin mərkəzində kiminlə birlikdə oynamağım önəmli deyil. Bu qərarı məşqçi verir. Mən sadəcə meydana çıxıb məşqçinin tapşırıqlarını dəqiq yerinə yetirməyə çalışıram", - deyə futbolçu bildirib.
Xatırladaq ki, komandalar arasında Danimarkada keçirilən ilk qarşılaşma "Orhus"un 2:1 hesablı qələbəsi ilə başa çatıb.
Qeyd edək ki, "Bank Respublika Arena"da keçiriləcək matç sabah saat 20:00-da start götürəcək.
