"Qəbələ"nin təcrübəli baş məşqçisi Kaxaber Sxadadze komandanın hazırlıq prosesi və yeni transferlərlə bağlı ətraflı açıqlamalar verib.
Oxu.Az xəbər verir ki, 51 yaşlı gürcüstanlı mütəxəssis klubun rəsmi saytına müsahibəsində komandanın çempionata ciddi hazırlaşdığını qeyd edib.
Sxadadze hazırlıq prosesinə yanvarın 4-dən start verdiklərini vurğulayıb:
"Təlim-məşq toplanışına yanvarın 4-dən başlamışıq və hazırda intensiv yüklənmələr həyata keçiririk. Qəbələdə məşq keçmək üçün ideal şərait mövcuddur, bu səbəbdən xarici toplanışa getməyə ehtiyac duymadıq. Burada meydançaların vəziyyəti, istirahət imkanları - hər şey bizim tələblərimizə tam cavab verir".
Komanda ilk yoxlama görüşündə "Kəpəz"i məğlub edib, lakin baş məşqçi oyunda müəyyən çatışmazlıqları da etiraf edib:
"İlk test matçında "Kəpəz"ə qalib gəlsək də, təbii olaraq səhvlər çox idi. Nəzərə almalıyıq ki, bu, ilk sınaq oyunumuz idi. Komandamız daha keyfiyyətli futbol nümayiş etdirməlidir. Çempionatın başlamasına cəmi iki həftə qalıb və bu qısa müddətdə həm fiziki hazırlığımızı, həm də oyun kondisiyalarımızı optimal səviyyəyə çatdırmalıyıq. Mövsümə yaxşı start götürərək vacib xallar qazanmağa çalışacağıq".
Baş məşqçi yeni transferlərin adaptasiya prosesi haqqında da danışıb. "Kəpəz"lə matçda debüt edib qol vuran nigeriyalı hücumçu İsmaeel Akinadenin performansını qiymətləndirən Sxadadze deyib:
"Akinade ilk oyununda şans qazandı, lakin ona hələ adaptasiya üçün vaxt lazımdır. Xüsusilə hücum xəttində çıxış edən futbolçulara yeni komandaya və oyun sisteminə uyğunlaşmaq üçün daha çox zaman tələb olunur".
Digər yeni transfer - seneqallı müdafiəçi Seydina Keytanın isə sağlamlıq problemi yaşadığını bildirən Sxadadze əlavə edib:
"Təəssüf ki, Keyta xəstələnmişdi və iki gün məşqlərdə iştirak edə bilmədi. Belə vəziyyətdə risk etməmək üçün onu 'Kəpəz'lə oyunda meydana buraxmadıq. Bununla belə, hər iki futbolçunun işə yanaşmasından razıyıq. İkisi də kifayət qədər təcrübəli oyunçulardır və inanıram ki, qısa zamanda komandamıza tam inteqrasiya olacaqlar."
Gürcüstanlı mütəxəssis klubun transfer siyasətinin davam etdiyini də vurğulayıb:
"Heyətimizdə hələ də gücləndirilməsi vacib olan mövqelər var və bu istiqamətdə ciddi işlər aparırıq. Klub direktorumuz Səbuhi Səfiyarlı bu məsələlərlə gərgin şəkildə məşğuldur. Transfer siyasətində diqqətli davranırıq, çünki səhvə yol vermək olmaz. Ümidvaram ki, qısa müddətdə yeni transferləri yekunlaşdıracaq və onlar da komandamıza tez bir zamanda adaptasiya olacaqlar".
Sxadadze yaxın günlərdə keçiriləcək daha iki yoxlama görüşü barədə də məlumat verib:
"Qarşıda iki test matçımız var - yanvarın 14-də "Araz-Naxçıvan", yanvarın 18-də isə "Baku Sportinq" komandaları ilə qarşılaşacağıq. İnanıram ki, bu görüşlər bizim üçün faydalı olacaq və çempionata tam hazır vəziyyətdə başlayacağıq."
