Türkiyə millisinin və "Benfika"nın futbolçusu Kerem Aktürkoğlunun "Fənərbağça"ya keçidi reallaşmayıb.
Oxu.Az Türkiyə mətbuatına istinadən xəbər verir ki, tərəflər arasında aparılan danışıqlar nəticəsiz başa çatıb və transfer rəsmi olaraq ləğv olunub.
Belə ki, "Fənərbağça" 26 yaşlı vinger üçün "Benfika"ya etdiyi 25 milyon avroluq təklifi geri çəkib.
Klub imtina səbəbi kimi təklif etdikləri şərtlərin pozulmasını göstərib.
Həmin şərt isə Keremin Çempionlar Liqasının 3-cü təsnifat mərhələsində "Nitsa" ilə keçiriləcək görüşdə meydana çıxarılmaması idi. Belə ki, "Benfika" bu şərti pozaraq futbolçunu 84-cü dəqiqədə oyuna daxil edib.
İstanbul təmsilçisi bundan sonra əvvəlkindən daha az məbləğli -18 milyon avroluq yeni təklif göndərib. Portuqaliya təmsilçisi bu təklifi rədd edib.
Qeyd edək ki, Kerem Aktürkoğlu "Benfika"ya 2024-cü ilin yayında İstanbul "Qalatasaray"ından transfer olunub.
