"Napoli"nin baş məşqçisi dəyişdi

İtaliyanın "Napoli" futbol klubunun rəhbərliyi fransalı məşqçi Rudi Qarsiya ilə yollarını ayırmaq qərarına gəlib.

Bu barədə komandanın Mətbuat Xidməti məlumat yayıb.

Məlumata görə, 2009-2013-cü illərdə komandaya rəhbərlik edən 62 yaşlı Valter Madzarri "Napoli"nin yeni baş məşqçisi təyin edilib. İtalyan mütəxəssisin son klubu 2021/22 mövsümünün sonunda tərk etdiyi "Kalyari" olub.

Qarsiya 59 yaşındadır və bu ilin iyununda "Napoli"nin sükanı arxasına keçib. Onun rəhbərliyi altında komanda 16 oyun keçirib, səkkiz qələbə qazanıb, dörd məğlubiyyət alıb və dörd dəfə heç-heçə edib. Ötən mövsüm "Napoli" 1990-cı ildən sonra ilk dəfə İtaliya çempionu olub. O zaman komandaya hazırda İtaliya millisini çalışdıran Luçano Spaletti rəhbərlik edib.

Qarsiya əvvəllər Fransanın "Sent-Etyen", "Dijon", "Le Man", "Lill", "Marsel" və "Lion" klublarına rəhbərlik edib, İtaliyada isə "Roma"da çalışıb. 2023-cü ilin aprelində fransalı mütəxəssis portuqaliyalı hücumçu Kriştianu Ronaldunun çıxış etdiyi Səudiyyə Ərəbistanının "Ən-Nəsr" klubunun baş məşqçisi postunu tərk edib.

Hazırda "Napoli" İtaliya çempionatının turnir cədvəlində dördüncü yerdədir. 12 turun nəticələrinə əsasən, komanda 21 xal toplayıb. Neapolitan klubunun futbolçuları İtaliya çempionatı çərçivəsində növbəti oyununu noyabrın 25-də səfərdə "Atalanta"ya qarşı keçirəcəklər.

Mənbə: TASS