"Neftçi" ilə görüşdə zədələnən Mikelsin son durumu necədir?

Azərbaycan Kubokunun yarımfinal mərhələsində "Neftçi" ilə qarşılaşan "Sabah"ın futbolçusu Coy Lens Mikels "ağ-qaralar"la görüşdə ciddi zədə alıb.

Mövzu ilə bağlı Oxu.Az-a açqılama verən "Sabah" klubunun mətbuat katibi Elnur Həmidov bildirib ki, Mikelsin zədəsi ilə bağlı dəqiq məlumatı ancaq sabah əldə etmək mümkün olacaq.

"Aldığı zədənin təsirindən hazırda futbolçunun ayağında şişkinlik ( hematoma) yarandığından belə vəziyyətdə MRT müayinəsi ilə tam dəqiq nəticəyə gəlmək çox çətindir. Bu səbəbdən, daha dəqiq məlumatı sabah əldə etmək mümkün olacaq", - deyə E.Həmidov bildirib.

Qeyd edək ki, "Neftçi" - "Sabah" yarımfinal görüşünün ilk oyunu qonaqların 2:1 hesablı qələbəsi ilə başa çatıb.

Anar Həsənov