21 yaşadək futbolçulardan ibarət Azərbaycan yığması bu gün yoxlama oyunu keçirib.
Oxu.Az xəbər verir ki, Türkiyənin Antalya şəhərində “Spartak”ın (Moskva) ikinci komandası ilə qarşılaşan millimiz qolsuz heç-heçə edib.
“Spartak-2” bu görüşdə baxışda olan futbolçularından istifadə edib. Güclü külək şəraitində keçən oyunda qeydə alınan heç-heçə U-21 millimizin yeni baş məşqçisi Milan Obradoviçin ilk matçı kimi tarixə düşüb. Onun oyunsonrası fikirləri ilə tanış olun:
“Tanışlıq baxımından qısamüddətli toplanış məni qane etdi. Komanda üzvləri ilə tanış olmağı planlaşdırmışdıq, məqsədimizə çatdığımızı deyə bilərəm. Oyuna gəldikdə, həm hücumda, həm də müdafiədə taktiki baxımdan planlaşdırdıqlarımızı yerinə yetirdik. Təbii ki, bu amil məni sevindirdi. Ancaq bundan daha yaxşı oynaya bilərdik. Əlverişsiz hava şəraiti imkanlarımızdan istifadə etməyimizə mane oldu.
Xüsusilə də birinci hissədə bunu daha çox hiss etdik. Çünki güclü küləyə qarşı da mübarizə apardıq. Uşaqlarda istək böyük idi. Onlar özlərini yaxşı tərəfdən göstərməyə, tapşırıqları daha yaxşı yerinə yetirməyə çalışdılar. Fərdi baxımdan səhvlərə yol verdik. İstənilən halda, bu oyun taktiki baxımdan yaxşı sınaq oldu. Düşərgəmizdə zədəli futbolçuların olduğunu da qeyd edim. Qarşıda görüləcək işlərimiz var”.
