"Real Madrid" klubu UEFA Çempionlar Liqasında rekorda imza atıb

"Real Madrid" ötən axşam UEFA Çempionlar Liqasının 1/8 final mərhələsinin ilk oyununda öz meydanında "Atletiko Madrid"i 2:1 hesabı ilə məğlub edib.

Oxu.Az "Opta"ya istinadən xəbər verir ki, bu qələbə "kral klubu"nun Çempionlar Liqası tarixində 300-cü zəfəri olub.

Mənbə təsnifat mərhələsinin oyunlarını nəzərə almayıb.

Beləliklə, "Real Madrid" Avropanın ən nüfuzlu klub yarışında 300 qələbə qazanan ilk klub olub. "Bavariya" ikinci yerdədir, lakin Münhen komandası çox geridədir - 237 qələbəsi var. Bu baxımdan, kiminsə nə vaxtsa "Real Madrid"ə çata biləcəyini söyləmək çətin görünür.

Qeyd edək ki, "Real Madrid" tarixində 15 dəfə qitənin əsas kubokunu başı üzərinə qaldırıb.