"Komandamı və oyunçularımı təbrik edirəm".
Oxu.Az-ın məlumatına görə, bu sözləri UEFA Çempionlar Liqasının 1-ci təsnifat mərhələsi çərçivəsində keçirilən "Sabah" - TNS (Uels) oyunundan sonra "Sabah"ın baş məşqçisi Valdas Dambrauskas deyib. O, çox çətin rəqiblə qarşılaşdıqlarını bildirib:
"Oyunun çətin keçəcəyini bilirdik. Dərin müdafiə olunan komandalara qarşı çıxış edəcəyimizi nəzərə alaraq, çox sakit və səbirli oynamaq lazım idi. Çox yaxşı qələbə qazandıq, lakin bu, hələ son deyil. Bizi çətin səfər gözləyir və süni örtüklü meydançada oynayacağıq. Diqqətli və daha çox fokuslanmış olmalıyıq. Rəqib iki top fərqini aradan qaldırmaq üçün daha çox irəli atılacaq. Biz də həmin hücumlar zamanı yaranan boşluqlardan yararlanmağa çalışacağıq".
Birinci hissədən sonra oyunda ciddi dəyişiklik etmək istəmədiyini bildirən baş məşqçi komandasının performansını belə qiymətləndirib: "Birinci hissədə ikinciyə nisbətən daha yaxşı oynadıq. Topun daha çox bizdə qalmasını istəyirdik. İlk qol künc zərbəsindən olsa da, ikinci qol tam istədiyimiz və hazırlaşdığımız şəkildə vuruldu. Birinci dəqiqədən sonuncu dəqiqəyə qədər üstünlük bizdə idi. Düşünürəm ki, layiqli qələbə qazandıq".
Valdas Dambrauskas oyunun sonunda qırmızı vərəqə alan Stiv Solvetin yoxluğu barədə də danışıb: "Solvetin qırmızı vərəqə alması səfər oyununda bizə çətinlik yaradacaq. Keçən mövsüm zədə səbəbindən bəzi oyunlarda o, heyətdə olmamışdı və biz onsuz da oynaya bilmişdik. Stiv bizim taktikamızda önəmli oyunçudur, lakin ehtiyat oyunçular skamyasında əsas heyət üzvlərini rahatlıqla əvəz edə biləcək futbolçularımız var".
Qeyd edək ki, "Bank Respublika Arena"da keçirilən "Sabah" - TNS oyunu təmsilçimizin 2:0 hesablı qələbəsi ilə başa çatıb. Cavab qarşılaşması iyulun 14-də Osvestri şəhərindəki "Park Hall" stadionunda keçiriləcək.
