"2026-cı ildə may ayının 10-dan 14-nə kimi Azərbaycanda "Bakı-Xankəndi" beynəlxalq velosiped yarışı keçiriləcək".
Oxu.Az xəbər verir ki, bunu Azərbaycan Velosiped İdmanı Federasiyasının birinci vitse-prezidenti Sahib Ələkbərov deyib.
O bildirib ki, yarışla bağlı olaraq təşkilat komitəsi yaradılıb:
"Bu gün təşkilat komitəsinin ilk iclası keçirilir. Velosiped yarışı ölkəmizin gözəlliklərini dünyaya tanıtmaq üçün müstəsna rol oynayır. Velosiped yarışı beş mərhələdən ibarət olur. Və onlar hər mərhələdə 150-200 kilometr arasında məsafə qət edirlər. Bu məsafəni qət edərkən isə ölkəmizin təbiətinin gözəlliklərini dünyaya nümayiş etdiririk. İlk dəfədir ki, bu yarışda beş mərhələnin hər biri "Eurosport" kanalı tərəfindən canlı olaraq yayımlanacaq".
"Biz bu fürsətdən səmərəli şəkildə istifadə etməliyik. Bu yarışın digər yarışlardan fərqləri var. Yarışın dördüncü və beşinci mərhələsi işğaldan azad olunmuş ərazilərimizdə keçiriləcək. Və biz həmin ərazilərdə ermənilərin törətdikləri dağıntıları da göstərəciyik", - deyə vitse-prezident qeyd edib.
Həmçinin tədbirdə yarışın loqosu da təqdim olunub. Loqoda Azərbaycan bayrağının rənglərindən və sonsuzluq işarəsindən istifadə olunub.
Murad Nəsimi
