“Bakıda olduğumuz üçün çox xoşbəxtik. Hər iki komanda "ağ-qara"dır. Həyat bəzən belə qarşılıqlı mühit yaradır”.
Oxu.Az xəbər verir ki, bu sözləri Türkiyənin “Beşiktaş” klubunun baş məşqçisi Şenol Güneş “Neftçi”yə qarşı keçirəcəkləri UEFA Konfrans Liqasının III təsnifat mərhələsinin ilk oyunu öncəsi mətbuat konfransında deyib.
Mütəxəssis komandasını çətin oyun gözlədiyini bildirib:
“Əvvəllər “Neftçi” ilə qarşılaşmaq istəmişik, indiyə qismət imiş. Cəsur olmaqla başqalarına yuxarıdan aşağı baxmaq fərqlidir. Hər rəqib ciddidir. Maddi durumuna və infrastrukturuna görə komandalar fərqli yerlərdə ola bilərlər. Amma qələbə meydanda qazanılır. Futbolda bəzən sürprizlər olur. Azərbaycanda futbol əvvəlki illərlə müqayisədə çox inkişaf edib. “Neftçi”nin doqquz ölkə çempionluğu var, avrokuboklarda çıxış edir. “Qarabağ” və “Sabah” da avrokuboklarda mübarizə aparırlar. Oyun keyfiyyəti və infrastruktur baxımından Azərbaycan futbolu çox yaxşı durumdadır. “Neftçi” qardaş ölkə komandası olsa da, sabah meydana qələbə üçün çıxacağıq”.
O, komandasının Bakıda çoxlu azarkeşlərinin olduğunu söyləyib:
“Bunu “Sabah”la xeyriyyə oyununda da gördük. Avropada da azarkeşlərimiz var. Onlar üçün yaxşı komanda formalaşdırmağa çalışırıq. Azarkeşlərin matçı dostluq içində izləmələrini istəyirəm. Petardaların aradan qaldırılmasını istəyirəm. Nəfəs alarkən belə insanı boğur. Üstəlik, bu, maddi baxımdan da zərər vurur. Görüntü olaraq gözəl görünə bilər, amma onların təbəssümü bu fişənglərdən daha yaxşıdır. Onlara layiq komanda olmağa çalışırıq. Burada neqativ bir halın olacağına inanmıram. Çünki qardaş ölkədəyik”.
“Beşiktaş”ın çalışdırıcısı Azərbaycan Premyer Liqa təmsilçisində diqqət çəkən futbolçuların adlarını da sadalayıb:
“Futbolu pozitiv oynamağa çalışan, rəqibə də çətin anlar yaşadan komanda olduğunu bilirəm. “Neftçi”nin “Tirana”dan güclü olduğunu əminliklə deyə bilərəm. Orta sahədə Emin Mahmudov, hücumda Lebon, Ozobiç fərqlənən oyunçulardır. Qara Qarayev oynamasa da, yaxşı futbolçudur. Demək olar ki, bütün futbolçuları yaxşıdır. “Neftçi” futbolçularının transfer qiymətlərinə görə, hazırda Azərbaycanın ən dəyərli komandasıdır”.
Qeyd edək ki, avqustun 10-da “Neftçi Arena”da keçiriləcək görüş saat 21:00-da başlayacaq.
Faiq Tahirov
