"Sumqayıt" klubu baş məşqçisinin adını ən qısa zamanda açıqlayacaq.
Oxu.Az Sportinfo.az-a istinadən xəbər verir ki, bu barədə klubun prezidenti Riad Rəfiyev məlumat verib.
Onun sözlərinə görə "Sumqayıt" klubu yalnız xarici baş məşqçilərlə danışıqlar aparır.
"Bu vəzifəyə bir neçə namizəd var. Hamısı xarici məşqçidir. Onlardan biri ilə müqavilə bağlamağa çox yaxınıq. Demək olar ki, müqavilə şərtlərində razılığa gəlmişik. Proses, uzağı, iyulun ilk həftəsinədək çəkəcək. Təyinatın ondan o yana qalacağını düşünmürəm. Bu gün deyə bilərəm ki, yeni baş məşqçimiz kifayət qədər tanınmış biri olacaq. Sürpriz təyinat kimi qarşılanacağı qənaətindəyəm. Demirəm bütün dünyada, amma Avropada tanınmış məşqçidir".
Əldə edilən məlumata görə isə adı hallanan çalışdırıcı Blaqoja Milevskidir.
O, 2019-2021-ci illər aralığında baş məşqçisi olduğu Şimali Makedoniyanın gənclər yığmasını Avropa çempionatının final mərhələsinə daşıyıb.
2011-ci ildən məşqçilik karyerasına start verən Milevski ötən müddətdə yerli "Vardar"la yanaşı, İsraildə "Aşdod"u çalışdırıb.
