UFC: Nəriman Abbasov iddiaçılar turnirində debüt döyüşünə çıxacaq - YENİLƏNİB

Azərbaycanın MMA idmançısı Nəriman Abbasov “Dana White’s Contender Series” (Deyna Vaytın İddiaçılar Seriyası) turnirində ilk döyüşünə çıxacaq.

“Report”un məlumatına görə, 28 yaşlı idmançı debütünü braziliyalı İsmael Bonfimə qarşı keçirəcək.

Abbasov indiyədək 28 qələbə qazanıb və cəmi 3 dəfə uduzub. “AMC Fight Nights” turnirinin qalibi olan idmançı ardıcıl 13 döyüşdür məğlubedilməzdir. “Marreta” (“Çəkic”) ləqəbli Bonfim isə 17 görüşdə qalib gəlib, 3 döyüşdə məğlub olub. 26 yaşlı idmançı da 11 döyüşdür qələbə qazanır.

Abbasovun döyüşü ABŞ-ın Las Veqas şəhərində sentyabrın 6-da yerli vaxtla saat 20:00-da (Bakı vaxtı ilə 7 sentyabr saat 07:00) keçiriləcək. Həmin döyüş gecəsində 5 görüş olacaq. Gecənin ikinci döyüşü Abbasovun iştirakı ilə baş tutacaq.

Rodolfo Bellato (8-1-0, Braziliya) – Vitor Petrino Salvo (6-0-0, Braziliya)

Qabriel Bonfim (12-0-0, Braziliya) – Trey Uoters (6-0-0, ABŞ)

Cimmi Louson (4-1-0, ABŞ) – Kevin Şaflarski (11-1-0, Polşa)

İsmael Bonfim (17-3-0, Braziliya) – Nəriman Abbasov (28-3-0, AZƏRBAYCAN)

Tereza Bleda (5-0-0, Çexiya) – Nayara Maya (7-0-1, Braziliya)

Qeyd edək ki, Nəriman Abbasov UFC ilə 5 döyüşlük müqavilə bağlayıb. Abbasov İsmael Bonfimə qalib gələcəyi halda, UFC-nin əsas divizionunda döyüş hüququ əldə edə bilər. Hələlik Azərbaycanın MMA təmsilçilərindən UFC-də döyüşmək üçün tam hüquqa Qırğızıstanda yaşayan Rafael Fiziyev və ABŞ-da məskunlaşmış Nazim Sadıqov yiyələnib.

18:56

“Rəqibi analiz etmək üçün kifayət qədər materialımız var idi. Nəriman Rusiya və Azərbaycan üçün hazırlıqlı idmançıdır. Amma o son 3-4 görüşündə eyni səviyyəli döyüşçülərlə qarşılaşıb”.

“Report”un məlumatına görə, bunu braziliyalı MMA döyüşçüsü İsmael Bonfim “Dana White’s Contender Series” (Deyna Vaytın İddiaçılar Seriyası) turnirində Azərbaycan təmsilçisi Nəriman Abbasova qarşı keçirəcəyi görüş barədə danışarkən deyib.

26 yaşlı idmançı Abbasovun aqressiv döyüşçü olduğunu bildirib:

“Gözlənilməz zərbələr vurmağı xoşlayır. Amma imkan düşəndə ​​rəqibi boğmağa çalışır ki, bu amil mənə çox kömək edəcək. Rəqibimin özündən çıxmasını sevirəm və o, məni yığmağa çalışanda daha çox sevinirəm. Yaxşı müdafiə olunacağam. Nəticədə Abbasov konsentrasiyanı itirəcək və mənə necə gəldi zərbələr endirəcək. O, 10, 15, 50 yumruq ata bilər. Hamısından yayınacağam. Hətta yıxılsam belə, ayağa qalxacağımdan əmin ola bilərsiniz. Nəriman bu döyüş məyus olacaq”.

Qeyd edək ki, döyüş ABŞ-ın Las Veqas şəhərində sentyabrın 6-da yerli vaxtla saat 20:00-da (Bakı vaxtı ilə 7 sentyabr saat 07:00) keçiriləcək. Həmin döyüş gecəsində 5 görüş olacaq. Gecənin ikinci döyüşü Abbasovun iştirakı ilə baş tutacaq.