"Qəbələ"nin yeni baş məşqçisi müəyyənləşib.
Oxu.Az klubun mətbuat xidmətinə istinadən xəbər verir ki, "qırmızı-qaralar" Şimali Makedoniyadan olan mütəxəssis Yeton Bekiri ilə 1+2 illik müqavilə imzalayıblar.
44 yaşlı məşqçi son olaraq ölkəsinin "Şkendiya" klubuna rəhbərlik edib. O, 2024/2025 mövsümündə "Şkendiya" ilə Şimali Makedoniya çempionu olub.
Bekiri karyerası ərzində "Drita", "Qostivar", "Renova", "Struqa" (Şimali Makedoniya) və "Bilis" (Albaniya) klublarında baş məşqçi, Səudiyyə Ərəbistanının "Əl-Cəbəleyn" komandasında isə idman direktoru vəzifəsində çalışıb.
Xatırladaq ki, Yeton Bekiri baş məqşçi kimi 2025-ci ilin avqust ayında UEFA Çempionlar Liqasının III təsnifat mərhələsində "Qarabağ" komandasına qarşı çıxış edib. İki oyunun nəticəsinə əsasən "Qarabağ" ümumi 6:1 hesabı ilə "Şkendiya"nı üstələyərək növbəti mərhələyə adlayıb.
