Vüqar Bağırov: "Xəyallarımdan biri "Ayaks" və ya "Barselona"da oynamaqdır"

"Ən böyük xəyallarımdan biri "Ayaks" və ya "Barselona" kimi nəhəng klublarda oynamaqdır".

Bunu Oxu.Az-a müsahibəsində "Turan Tovuz" klubunun əvəzedicilərindən ibarət komandasında çıxış edən futbolçu Vüqar Bağırov deyib.

- Futbola marağınız necə başladı?

- 4-5 yaşlarında olardım, məhəllədə futbol oynayan uşaqları gördüm, mən də oynamağa başladım. Günlər keçdikcə bu idman növünə həvəsimin çox artdığını və potensiyalımın olduğunu gördüm.

- İlk dəfə hansı klubda məşqlərə başlamısınız?

- İlk dəfə "Qarabağ"da məşqlərə başlamışam

- Futbolu sizə sevdirən futbolçu kim olub?

- Məni futbola sevdirən Lionel Messi olub. Çünki, oyun tərzi və sol ayaq olması məndə xüsusi maraq yaratdı. Buna səbəb mənim də sol ayaqla oynamağımdır.

- Hansı mövqedə oynayırsınız və bu mövqeni seçməyinizin səbəbi nədir?

- Açığı mövqe olaraq cinah hücumçusu kimi oynaya bilsəm də, daha çox sol cinahda, müdafiədə çıxış edirəm.

- Bu günə qədər ən yaddaqalan oyununuz hansıdır?

- Ən yaddaqalan oyunum 2023-cü ildə də "Alanyaspor" - "Trabzonspor" görüşü olub. O oyunda komandamızın geridə olmasına baxmayaraq, son dəqiqələrdə qollar vuraraq qələbə qazanmışdıq və həmin qarşılaşmada bir məhsuldar ötürmə etmişdim.

- Peşəkar karyeranızda sizi ən çox çətinliyə salan məqam nə olub?

- Mənim həmişə xaricdə sənədlə bağlı problemlərim olurdu. Məyus olduğum məqamlar o idi ki, komandama lazımlı vaxtlarda kömək edə bilmirdim. Bu isə mənə psixoloji olaraq əks təsir göstərirdi.

- Komandada özünüzü necə hiss edirsiniz? Komanda ruhu sizin üçün nə qədər vacibdir?

- Komandaya yeni gəlməyimə baxmayaraq məni çox yaxşı qarşıladılar. Komandamı və yoldaşlarımı çox sevirəm. Biz hər həftə oyuna köklənib, qələbə qazanmaq üçün stadiona çıxırıq. Komandamın canla-başla mübarizə aparması məni çox sevindirir və istədiyimiz nəticəyə də nail oluruq.

- Əgər bir oyun üçün istənilən futbolçunu komanda yoldaşın kimi seçə bilsəydin, bu, kim olardı və niyə?

- Alexandro Balde ("Barselona") ilə birlikdə oynamaq istəyərdim. Bunun səbəbi, sürətli oyun qurması, dəqiq pasları və yeri gəldiyində kritik qollar vurmağı bacarmasıdır. Komandası üçün çox faydalı oyunçudur.

- Uğursuzluqlardan necə yayınmağı bacarırsınız?

- Mənim bu günə kimi əldə etdiyim bütün uğurlar anamın sayəsindədir. Tribunada onun üzünün güldüyünü görmək və mənimlə qürur duyması ən böyük motivasiya səbəbidir.

- Futbol sizə səbir etməyi, yoxsa risk etməyi öyrədib?

- İstər yüksəliş, istərsə də düşüş anlarında insan üzərində çox çalışmalı, səbirli olmalı və disiplinini qorumalıdır. Bu yalnız futbolçular üçün yox, hər kəs üçün keçərlidir.

- Futboldan kənar vaxtlarınızı necə keçirirsiniz?

- Futboldan kənar vaxtımı ailəmlə, dostlarımla keçirirəm.

- Boş vaxtlarınızda hansı məşğuliyyətləri sevirsiniz?

- Boş qalmağı sevmirəm, bu səbəbdən də ekstra məşqlər edirəm və üzgüçülük ilə məşğul oluram.

- Azarkeşlərlə necə münasibət qurursunuz?

- Azarkeşlərimizin hər biri mənə çox stimul verir. Bu səbəbdən də onlara minnətdaram.

- Özünüzü beş ildən sonra harada görürsünüz?

- Özümü beş ildən sonra komandamın aparıcı və ən əsas oyunçusu olaraq görürəm.

- Gələcəkdə legioner həyatı yaşasanız, hansı klublarda çıxış etmək istəyərdiniz?

- "Ayaks" və ya "Barselona"da oynamaq istəyərəm.

- Futbol karyeranız bitdikdən sonra hansı sahədə fəaliyyət göstərmək istəyərdiniz?

- Açığı, bunu heç fikirləşməmişəm. Mənim üçün maraqlı sual oldu. Amma zənnimcə gələcəkdə menecer və ya məşqçi olmaq barədə düşünə bilərəm.

- Sizcə, komandanızda kim "gizli istedaddır" - meydanda və ya meydandan kənarda?

- Mənim gözümdə hər bir komanda yoldaşım güclü futbolçudur. Amma bir ad vermək lazımdırsa, bu, Xəyal Nəcəfovdur.

- Milli komandada oynamaq hədəfiniz varmı?

- Arzum millimizdə oynamaq və ölkəmi layiqincə təmsil etməkdir.

- Vaxtı ilə "Alanyaspor" klubunda çıxış etmisiniz. Oradan ayrılmanıza səbəb nə oldu?

- Az öncə də qeyd etdiyim kimi, ancaq və ancaq sənəd problemləri.

- Legioner həyatı yaşamaq daha yaxşıdır, yoxsa öz ölkənizin klublarında?

- Hər ikisi də mənim üçün yararlı olub. Hazırda yerli çempionatımızda çıxış edirəm və burada uğur qazanmağa çalışıram.

- Gənc futbolçulara və futbolçu olmaq istəyənlərə nə tövsiyə edərdin?

- Futbolun hər bir anında - istər enişdə, istər zirvədə xəyallarından əl çəkməsinlər və ancaq üzərlərində daha çox çalışsınlar.

Anar Həsənov