Azərbaycan alpinisti Vəfa Musayeva daha bir zirvəni fəth edib.
Oxu.Az xəbər verir ki, idmançımız 8 516 m hündürlüyə malik Lhotse dağının zirvəsinə qalxıb.
Bundan 2 gün əvvəl Everesti fəth edən alpinistimiz 7900-8000 metr hündürlükdə yerləşən düşərgəyə enib. Amma ikinci zirvəni fəth etmək qərarına gələn Vəfa bu dəfə Lhotseyə qalxıb. Bununla da Musayeva 3 gün ərzində 2-ci dəfə 8000 metrdən artıq yüksəkliyi fəth edib. Hazırda baza düşərgədə olan idmançınız 8000 metrdən yuxarıda dörd gündən çox vaxt keçirib.
Musayeva ikinci zirvəni fəth etdikdən sonra fikirlərini sosial şəbəkə paylaşımında bölüşüb:
"Missiya yerinə yetirildi. Salamatam. Bir az əvvəl Everest baza düşərgəsinə geri döndüm. Təbriklərə görə təşəkkür edirəm. Tezliklə evimə çatıb, təndir çörəklə dovğa yemək ümidi ilə".
Qeyd edək ki, Lhotse planetin dördüncü ən hündür zirvəsidir və Everestdən üç kilometr məsafədə yerləşir.
