Ağ Ev rüsumlar haqqında ziddiyyətli məlumatlar dərc edir - Səhv, yoxsa təhrif?

ABŞ Prezidenti Donald Tramp Administrasiyası 14 ölkəyə qarşı tətbiq edilən ticarət rüsumlarının həcmi ilə bağlı ziddiyyətli məlumatlar səbəbindən diqqət mərkəzinə düşüb.

Oxu.Az-ın verdiyi məlumata görə, bu məsələyə "Bloomberg" diqqət çəkib.

Belə ki, Ağ Evin rəsmi press-relizindəki rüsumların miqdarı ilə administrasiyanın "X" səhifəsində əvvəllər dərc edilmiş məlumatdakı göstəricilər arasında bir faizlik fərq var.

Məsələn, rəsmi sənədə görə, Hindistana qarşı ticarət məhdudiyyətləri 27% təşkil edir, halbuki "X"dəki ilkin cədvəldə 26% göstərilib. Oxşar fərqlər Botsvana, Vanuatu, Kamerun, Malavi, Nikaraqua, Norveç, Pakistan, Serbiya, Tailand, Filippin, CAR, Cənubi Koreya və Folklend adalarına münasibətdə də müşahidə olunur.

Ən təəccüblüsü isə odur ki, Fransanın dənizaşırı ərazisi olan Reyunyona qarşı Ağ Evin cədvəlində əvvəl 37% həcmində rüsumun tətbiq ediləcəyi elan olunsa da, indi regionun adı rəsmi siyahıdan tamamilə yoxa çıxıb.

Xatırladaq ki, aprelin 2-də Tramp ABŞ hökumətinin bir çox ölkədən edilən idxala gömrük rüsumları tətbiq edəcəyini bildirib. Avropa İttifaqına qarşı bu göstərici 20%-ə bərabər olacaq.