Maliyyə Nazirliyi Azərbaycanın xarici borcu haqqında məlumat yayıb.
Oxu.Az nazirliyə istinadən xəbər verir ki, 2015-ci il oktyabrın 1-nə Azərbaycanın xarici dövlət borcu 6 milyard 730,9 milyon dolları (7 milyard 054 milyon manat), xarici dövlət borcunun Ümumi Daxili Məhsula (ÜDM) olan nisbəti 12,4% təşkil edib.
Borc statistikasına hökumətin birbaşa öhdəlikləri və dövlət zəmanətilə cəlb edilmiş kreditlər üzrə şərti öhdəliklər daxil edilib.
Borc vəsaitlərinin 8%-i 10 ilə qədər, 58,6%-i 10 ildən 20 ilə qədər, 33,4%-i isə 20 ildən artıq olan müddətə cəlb olunub.
2015-ci il oktyabrın 1-nə olan məlumata görə, xarici borc üzrə alınan kreditlərin valyuta tərkibi aşağıdakı kimi olub: XBH (Beynəlxalq Valyuta Fondunun Xüsusi Borcalma Hüquqları) - 9,4%, valyutalar üzrə isə dollar ilə – 66%, avro – 20,3%, yapon yeni – 2,6%, İslam dinarı – 0,6%, BƏƏ dirhəmi – 0,5%, Səudiyyə rialı – 0,4%, Küveyt dinarı – 0,2%.
Əsasən Dünya Bankı, Asiya İnkişaf Bankı, İslam İnkişaf Bankı, Avropa Yenidənqurma və İnkişaf Bankı, Yaponiya Beynəlxalq Əməkdaşlıq Agentliyi və digər beynəlxalq maliyyə qurumlarından cəlb edilmiş vəsaitlər iqtisadi islahatlar proqramlarının dəstəklənməsi, infrastrukturun bərpası və yenidən qurulması, habelə yol tikintisi, regionların su təchizatının yaxşılaşdırılması, dəmir yolu nəqliyyatı xidmətlərinin təkmilləşdirilməsi, sənaye və s. sahələrə istifadə edilib.
E.Ə.
www.oxu.az
