“Azərikimya”ya yeni baş direktor təyin edilib

Dövlət Neft Şirkətinin (SOCAR) “Azərikimya” İstehsalat Birliyinə yeni baş direktor təyin edilib.

Bu barədə SOCAR məlumat yayıb.

Bildirilib ki, yeni direktor Elnur Məmmədlidir.

O, 17 ildən artıqdır ki, SOCAR-ın müəssisələrində çalışır, son yeddi ildə isə “SOCAR Türkiyə” şirkətində müxtəlif rəhbər vəzifələrdə işləyib və yeni vəzifəsində İmran Arzumanzadə əvəz edib.

Xatırladaq ki, “Azərikimya”nın strukturuna Etilen-Polietilen zavodu (“EP-300”, “Polimir-120” istehsalatlarından, izopropil spirti istehsalı sahəsindən, Buxar və elektrik enerjisi istehsalatından ibarət) və Təmir-Tikinti İdarəsi daxildir.