Bakıda “28 May” metrostansiyasının yaxınlığında tikilməsi nəzərdə tutulan yeni tunel layihəsi artıq təsdiq olunma mərhələsindədir.
Oxu.Az APA-Economics-ə istinadən xəbər verir ki, bunu “Bakı Metropoliteni” QSC-nin mətbuat xidmətinin rəhbəri Nəsimi Paşayev bildirib.
Onun sözlərinə görə, hazırda layihədə bəzi detalların dəqiqləşdirilməsi işləri gedir.
Tikiləcək tunel “Xətai”–“Azadlıq prospekti” xəttini “İçərişəhər”–“Həzi Aslanov” xəttindən ayırmaqla, hər iki marşrutun sərbəst istismarını təşkil etməyi nəzərdə tutur.
Belə ki, bu ayrılmadan sonra “Dərnəgül” metrostansiyasından “Həzi Aslanov” istiqamətində hərəkət edən qatar “Nizami” stansiyasından sonra “28 May” stansiyasına daxil olmayacaq.
Qatar “Nizami” stansiyasına az qalmış yeni tunellə “Cəfər Cabbarlı” stansiyasına daxil olacaq, oradan isə “Xətai” stansiyasına gedəcək. Bununla da, daha “28 May” stansiyasında hər iki tərəfə qatar getməyəcək.
