Elnur Abdullayev: İntellektual nəqliyyat sistemi təkmilləşdiriləcək

Bakı şəhərində keçiriləcək birinci Avropa Oyunları ilə əlaqədar intellektual nəqliyyat sisteminin təkmilləşdirilməsi işləri aparılacaq.

Müvafiq strukturlar 2015-ci ildə Bakıda birinci Avropa Oyunlarının keçirilməsi ilə əlaqədar paytaxtımızın yol-nəqliyyat infrastrukturunun təkmilləşdirilməsi istiqamətində işləri sürətləndirib.

Ümumiyyətlə, Avropa Oyunlarınadək paytaxtın yol-nəqliyyat infrastrukturunda görülməli olan işlərin planı hazırlaınb və artıq bu istiqamətdə real addımlar atılır.

Dövlətimizin başçısı 2015-ci ildə Bakıda keçiriləcək birinci Avropa Oyunları Təşkilat Komitəsinin ötən il fevralın 2-də keçirilən ilk iclasında deyib:

“Bu günə qədər bir neçə Olimpiya Oyunlarının tədbirlərində iştirak etmiş adam kimi səmimi şəkildə deyə bilərəm ki, heç bir yerdə nəqliyyat məsələləri hələ lazımi səviyyədə həll olunmamışdır. Hesab edirəm ki, Bakıda keçirilən oyunlar bu sahəyə də öz standartlarını tətbiq etməlidir və ondan sonra Azərbaycan, Bakı standartları digər şəhərlər üçün də nümunə ola bilər. Biz bu məsələyə də kompleks şəkildə baxmalıyıq”.

Azərbaycan Prezidentinin bu sahədə qarşıya qoyduğu mühüm vəzifələrə uyğun olaraq ötən il Nəqliyyat Nazirliyində keçirilən iclas çərçivəsində nəqliyyat xidmətlərinin təşkilinə dair Avropa Oyunları Təşkilat Komitəsi tərəfindən cəlb edilmiş mütəxəssislərlə görüş olub. Bu məqsədlə Nəqliyyat Nazirliyində müvafiq işçi qrupu da yaradılıb. İclasda nəqliyyat xidmətlərinin uğurlu təşkili və yüksək keyfiyyətli xidmətin göstərilməsi üçün müvafiq tapşırıqlar verilib.

Qeyd etmək lazımdır ki, son illər Bakı şəhərində nəqliyyat infrastrukturunun təkmilləşdirilməsi üçün böyük işlər görülüb. Lakin bu infrastruktur günün tələblərinə cavab verməsi üçün daim yenilənməlidir.

Paytaxtda nəqliyyatın hərəkətinin təşkilində önəmli rol oynayan Nəqliyyatı İntellektual İdarəetmə Mərkəzi (NİİM) də bu istiqamətdə fəaliyyətini canlandırıb. Mərkəzin baş direktoru Elnur Abdullayev deyir ki, biz hələ intellektual nəqliyyat sistemi layihəsini həyata keçirərkən bu istiqamətdə işləri planlaşdırmışdıq.

“Layihəyə uyğun olaraq intellektual nəqliyyat sisteminin iş prinsipi, fəaliyyəti ilə bağlı əhalini məlumatlandırmaq üçün müvafiq internet saytı yaradılıb. Sayt portal formasında Azərbaycan və ingilis dillərində fəaliyyət göstərir. Artıq əcnəbi vətəndaşlar da bu saytdan yararlana bilərlər. Vətəndaşların saytdan daha rahat istifadə edə bilmələri üçün hazırda saytımızın təkmilləşdirilməsi və yeni dizaynda hazırlanması istiqamətində işlər görülür. Avropa Oyunları ərəfəsində saytımızı yeni formatda və dizaynda istifadəyə verəcəyik”, - deyə, o, vurğulayıb.

Nəqliyyat məsələləri üzrə NİİM-də 24 saat fəaliyyət göstərən vahid əlaqələndirmə qərargahının yaradılması və onun fəaliyyətinin təmin edilməsi istiqamətində görülən işlərdən danışan E.Abdullayev qeyd edib ki, ötən ilin ikinci yarısından başlayaraq bu sahədə bir çox tədbirlər reallaşdırılıb:

“Nəqliyyat nazirinin əmri ilə müvafiq işçi qrupu yaradılıb və qrupa nazirliyin tərkibindəki müvafiq qurumların rəhbərləri daxil edilib. Eyni zamanda, Bakı şəhərində keçiriləcək birinci Avropa Oyunları üzrə Təşkilat Komitəsinin nəqliyyat məsələləri üzrə əməkdaşları ilə bir sıra görüşlər keçirilib. Əmrin müvafiq bəndinə uyğun olaraq NİİM-də xüsusi qərargah da yaradılıb”.

NİİM-in baş direktoru birinci Avropa Oyunları ilə əlaqədar dayanacaqlarda wi-fi sisteminin quraşdırılıb-quraşdırılmayacağı ilə bağlı suala cavabında bildirib ki, ötən ildən etibarən sistemin quraşdırılması istiqamətində araşdırmalara başlamışıq.

Müəyyən alqoritmlər, strukturlar müzakirə olunub, bəzi şirkətlərlə görüşlər keçirilib. Müvafiq qərar verildikdən sonra bu istiqamətdə real addımlar atılacaq.

İntellektual nəqliyyat sisteminin təkmilləşdirilməsi və genişləndirilməsi barədə məlumat verən NİİM-in baş direktoru deyib ki, bu layihənin 3 mərhələdə həyata keçirilməsi nəzərdə tutulub. İlk mərhələ artıq başa çatmış, ikinci və üçüncü mərhələlərlə bağlı müəyyən işlər aparılıb. Birinci Avropa Oyunlarının keçirilməsi ilə əlaqədar ikinci mərhələ 2 hissəyə bölünüb:

“Birinci hissədə oyunların keçirilməsi ilə bağlı intellektual nəqliyyat sisteminin təkmilləşdirilməsi işləri aparılacaq.

Bundan əlavə, hazırda NİİM-də “141 Qaynar xətti” fəaliyyət göstərir. Təbii ki, birinci Avropa Oyunlarının keçiriləcəyi müddətdə nəqliyyat məsələləri üzrə “Qaynar xətt”in funksiyaları genişləndiriləcək. İyirmi dörd saat fəaliyyətlə bərabər, həm də gücləndirilmiş iş rejimində çalışacağıq.

Qeyd edim ki, 2012-ci ildə Bakıda keçirilmiş “Eurovision” mahnı müsabiqəsi zamanı da bu xidmətin fəaliyyəti yarışmanın Təşkilat Komitəsinə təqdim olunub və həmin vaxt “141 Qaynar xətti”nin xidmətlərindən əcnəbi vətəndaşlar geniş yararlanıblar.

Bakı şəhərində avtobus dayanacaqlarının adlarının müəyyənləşdirilərək Azərbaycan və ingilis dillərində yazılmasına gəldikdə isə deməliyəm ki, avtobus dayanacaqlarının adlarının müəyyənləşdirilməsi intellektual nəqliyyat sistemi həyata keçirilərkən tam həllini tapıb. Azərbaycan Milli Elmlər Akademiyasına müvafiq məktub göndərilərək razılıq alınıb.

Həmin adlardan hazırda internet saytında və bizim sistemin digər vasitələrində istifadə etmək mümkündür. Dayanacaqların üzərində yazıların quraşdırılması məsələsi ilə əlaqədar Dövlət Avtomobil Nəqliyyatı Xidməti ilə birlikdə aparılan işlər qısa müddətdə tam başa çatdırılacaq.

Danılmaz faktdır ki, paytaxtımız artıq dünya ictimaiyyəti tərəfindən beynəlxalq tədbirlər məkanı kimi tanınır. Ölkəmizin bu cür mühüm tədbirlərdəki təşkilatçılıq qabiliyyəti də beynəlxalq aləmdə razılıqla qarşılanır. Göründüyü kimi, bir çox dünya səviyyəli yarışların, siyasi və mədəni tədbirlərin keçirilməsində böyük təcrübə qazanmış küləklər şəhəri Bakı birinci Avropa Oyunlarına da həvəslə hazırlaşır. NİİM-in kollektivi də bu sahədə üzərinə düşən vəzifələrin öhdəsindən layiqincə gələcəyinə əmindir”. 

www.oxu.az