Ötən gün təməli qoyulan Naxçıvan Sənaye Parkı 310 hektar ərazini əhatə edəcək.
Oxu.Az xəbər verir ki, bu barədə "Report"a inşasına ilkin hazırlıq işlərinin başlandığı parkda məlumat verilib.
Bildirilib ki, Naxçıvan Sənaye Parkı Azərbaycan Respublikası Prezidentinin 5 dekabr 2024-cü il tarixli Fərmanı əsasında yaradılıb. Parkın fəaliyyətinin təşkili məqsədilə ilkin mərhələdə ərazinin istifadəyə yararlı vəziyyətə gətirilməsi, növbəti mərhələdə isə xarici və daxili infrastrukturun, o cümlədən elektrik və istilik enerjisi, qaz, su, rabitə, nəqliyyat, istehsal, inzibati, sosial və digər obyektlərin yaradılması nəzərdə tutulur.
Naxçıvan şəhərinin cənub-qərb hissəsində, Naxçıvan-Sədərək avtomobil yolunun cənubunda salınacaq sənaye parkı 310 hektar ərazini əhatə edəcək. Hazırda sənaye parkına potensial sahibkarların cəlb edilməsi istiqamətində bir sıra layihələr üzrə danışıqlar aparılır.
Qeyd edək ki, Prezident İlham Əliyev və birinci xanım Mehriban Əliyeva avqustun 11-də Naxçıvan Sənaye Parkının təməlqoyma mərasimində iştirak ediblər.
