Adam öldürməkdə şübhəli bilinən çörəkçinin DƏHŞƏTLİ ETİRAFI: "Bıçaqla qulağımı kəsdi"

Bakıda iş yoldaşının qətlində təqsirləndirilən Şahlar Ağayevin cinayət işi üzrə məhkəmə baxış iclası keçirilib.

Oxu.Az Lent.az-a istinadən məlumat verir ki, Bakı Ağır Cinayətlər Məhkəməsinin hakimi Aygün Qurbanovanın sədrliyi ilə keçirilən prosesdə təqsirləndirilən şəxs ifadə verib.

Şahlar Ağayev bildirib ki, çörək və un məmulatları istehsal edən "Aleks" MMC şirkətində çörəkçi işləyib:

"Mart ayının 12-si idi. İş yoldaşım Pünhan soyunub-geyinmə otağında qapının ağzında durmuşdu. Ondan mənə yol verməsini xahiş etdim. O isə aqressiv cavab verdi. Növbəti gün o, mənə çiyin atdı, üstümə gəldi və sağ qaşımın üstünü partlatdı. Hətta iş yoldaşımız olan qadına da xəsarət yetirdi. Müdiriyyət işə qarışdı, mən isə barışdığımızı bildirdim. Sonra Pünhan məndən mobil nömrəmi istədi. Növbəti gün məni Qara Qarayev metrosunun yanına çağırdı. Mən ancaq xoş niyyətlə görüşüb çay içə biləcəyimi dedim. O, yaşadığım Alatava qəsəbəsinə gəldi. Çayxanaya gedəcəyimizi dedi və avtomobilə oturmağımı istədi. Maşına oturandan sonra sürücü ilə məni tanış etdi, dedi ki, dostu Elmardır. Onlar bir neçə nəfər idilər. Gördüm ki, Pünhanın üstündə bıçaq var. Maşını saxlatmaq istəsəm də, sürücü maşını saxlamadı. Mən tıxacda fürsətdən istifadə edib maşından düşdüm. Lakin o məni qırağa çəkib üzərində olan bıçaqla mədəmin üstünə vurmaq istədi. Zərbədən yayındım, lakin Pünhan məndən əl çəkməyərək əlindəki bıçaqla qulağımı kəsdi. Bu barədə vəkilimdə ekspertiza rəyi var. Həmin vaxt orada Pünhan tərəfdən 5 nəfər var idi. Mən çarəsiz qalıb cibimdə olan, işdə istifadə etdiyim bıçağı çıxardım. Bilmədim nə edim, affekt vəziyyətinə düşdüm. İki gün sonra polis bölməsində bildim ki, ölüm hadisəsi baş verib".

Məhkəmənin növbəti iclası fevralın 17-nə təyin edilib.

Xatırladaq ki, hadisə ötən ilin martında paytaxtın Yasamal rayonu ərazisində baş verib.

Belə ki, 1992-ci il təvəllüdlü Pünhan Fərzallının öldürülməsi barədə rayon prokurorluğuna məlumat daxil olub.

Araşdırmalarla 1999-cu il təvəllüdlü Şahlar Ağayevin Yasamal rayonu, Tbilisi prospekti ərazisində şəxsi münasibətlər zəminində aralarında yaranmış mübahisə zamanı bıçaqla xəsarət yetirərək Pünhan Fərzallını qəsdən öldürməsinə əsaslı şübhələr müəyyən edilib.

Şahlar Ağayev hüquq mühafizə orqanlarının əməkdaşları tərəfindən şübhəli şəxs qismində tutulub.

Ona qarşı Cinayət Məcəlləsinin 120.1-ci (qəsdən adam öldürmə) maddəsilə ittiham irəli sürülüb.