Ağadadaş Ağayevə HÖKM OXUNDU

Xalq artisti Ağadaş Ağayevlə "Medera Hospital"ın mühafizəçisi Nurəddin Cəlilovla olan insidentin cinayət işinin məhkəmə istintaqı yekunlaşıb.

Oxu.Az-ın məlumatına görə, Binəqədi Rayon Məhkəməsində hakim Vüsal Tağıyevin sədrliyi ilə keçirilən prosesdə hökm oxunub.

Hökmə əsasən, Ağadadaş Ağayevə iki il müddətə azadlıqdan məhrumetmə cəzası təyin olunub. Cinayət Məcəlləsinin 70-ci (şərti məhkumetmə) maddəsi tətbiq edilməklə Ağadadaş Ağayevə təyin olunan cəza şərti hesab edilib. Ona 1 il sınaq müddəti təyin olunub.

Xatırladaq ki, ötən prosesdə dövlət ittihamçısı Ağadadaş Ağayevə 2 il azadlıqdan məhrumetmə cəzasının təyin edilməsini, Cinayət Məcəlləsinin 70-ci (şərti məhkumetmə) maddəsi tətbiq edilməklə həmin cəzanın şərti hesab olunmasını istəmişdi.

Qeyd edək ki, hadisə ötən ilin iyul ayında baş verib.

Ağadadaş Ağayevin mübahisə etdiyi Nurəddin Cəlilov və müğənninin atdığı baltanın dəydiyi xadimə Nəzakət Paşayeva Xalq artistinin cinayət işində zərərçəkən qismində tanınıb.

Eləcə də, onun mübahisə etdiyi Nurəddin Cəlilov barəsində də cinayət işi açılıb.

Sözügedən məsələ ilə bağlı tərəflər barışıblar. Həmçinin Ağadadaş Ağayevin "MedEra" hospitala, eləcə də hospitalın Xalq artistinə qarşı qaldırdığı mülki iddiaya da xitam verilib.

Ağadadaş Ağayev Cinayət Məcəlləsinin 221.3-cü (xuliqanlıq, silah qismində istifadə olunan əşyalardan istifadə etməklə törədildikdə) maddəsi ilə təqsirli bilinir.

Ağadadaş Ağayevə HÖKM OXUNDU

Ağadadaş Ağayevə HÖKM OXUNDU

Elgün Həsənli