İş yoldaşını stəkanla vuraraq qətlə yetirməkdə təqsirləndirilən Möhsün Abdullayevin cinayət işi üzrə məhkəmə prosesi davam edir.
Oxu.Az xəbər verir ki, Bakı Ağır Cinayətlər Məhkəməsində hakim Elnur Nuriyevin sədrliyi ilə keçirilən iclasda zərərçəkmiş Bahadur Tağıyevin həyat yoldaşı ifadə verib.
O bildirib ki, hadisədən əvvəl Möhsün Abdullayevi tanımayıb:
"Hadisə günü bildim ki, Bahadurun belə bir iş yoldaşı olub. Onu öldürməklə ailəmizi məhv etdi. Bahadurun ölümündən sonra çox pis vəziyyətə düşdük, ailəm başsız qaldı. Gərək belə etməyəydi".
Məhkəmədə ifadə verən şahidlər - mərhumun iş yoldaşları deyiblər ki, Bahaduru müəssisənin həyətində, konteynerin yaxınlığında başı qan içində, lakin sağ vəziyyətdə görüblər. Onların sözlərinə görə, Bahadur yıxıldığını bildirib.
Daha sonra hadisə barədə Təcili Tibbi Yardıma məlumat verilib, lakin hadisə yerinə gələn həkimlər onun artıq öldüyünü müəyyən ediblər.
İstintaq materiallarına əsasən, hadisə zamanı Möhsün Abdullayev və Bahadur Tağıyev çay içərkən mübahisə ediblər. Mübahisə zamanı Möhsün əlindəki stəkanla Bahadurun başına bir neçə zərbə endirib, daha sonra yumruq və təpiklə vurmağa davam edib. Tağıyev aldığı xəsarətlərdən müəssisənin həyətində dünyasını dəyişib.
Məhkəmə istintaqı yekunlaşıb, növbəti proses oktyabrın 24-nə təyin edilib.
Qeyd edək ki, 1970-ci il təvəllüdlü Möhsün Abdullayev 1997-ci ildə zorlama cinayətinə görə məhkum olunub. O, "Avrasiya İnşaat" ASC-də qəlibçi işləyib və bu dəfə iş yoldaşını qəsdən öldürməkdə təqsirləndirilir. Onun barəsində Cinayət Məcəlləsinin 120.1-ci (qəsdən adam öldürmə) maddəsi ilə cinayət işi açılıb.
Elgün Həsənli
