Şəkinin Cəyirli kəndində 34 yaşlı Zəhra Əliyeva atasının evində qətlə yetirilib.
Qadının həyat yoldaşı tərəfindən bıçaqlanaraq öldürüldüyü bildirilir.
"Səhər saatlarında yoldaşım zəng edib dedi ki, bacını bıçaqlayıblar, tez evə gəl. Gəlib gördüm ki, bacım yerdə uzanıb. O, artıq 9 aydır ki, bizimlə qalırdı. Boşanma ərəfəsində idilər, 3-4 aydır ki, məhkəmə prosesi gedirdi. Həyat yoldaşı 9 aydır axtarışda idi. Uşaqların gözü qarşısında bacımı bıçaqlayıb", - mərhumun qardaşı deyib.
Məlumata görə, Zəhra Əliyeva Həmid Əliyevlə ailə həyatı qurduqdan sonra atası ilə birgə yaşayıblar. Onların 3 və 13 yaşlı iki övladı var. Həmid Əliyevin hadisəni törətdikdən sonra qaçdığı bildirilir.
Faktla bağlı araşdırma aparılır.
Ətraflı Baku TV-nin süjetində:
Şəkidə 34 yaşlı qadının qətlə yetirilməsinin bəzi təfərrüatları məlum olub.
Oxu.Az-ın məlumatına görə, qətlə yetirilən Zəhra Əliyeva bir ildən artıq müddət imiş ki, həyat yoldaşı H.Əliyevdən ayrılıb, atasının evində yaşayırmış. İki uşaq anası olan Z.Əliyeva övladları ilə birlikdə atasının himayəsində olub. Ailəsindən ayrılandan bu günə qədər o, həyat yoldaşından övladları üçün aliment ala bilməyib.
Z.Əliyeva bununla bağlı Şəki Rayon Məhkəməsinə müraciət edib. O, həm rəsmi boşanmaq, həm də aliment ala bilməməsi üçün məhkəməyə ərizə verib. Şəki rayon Məhkəməsində cütlüyün boşanması ilə bağlı dəfələrlə məhkəmə prosesi keçirilsə də, H.Əliyev heç bir məhkəməyə gəlməyib. Şəki Rayon Məhkəməsi isə onun barəsində axtarış elan edib.
Məlumata görə, H.Əliyevin həm də banka külli miqdarda borcu olub. Elə bu məqsədlə də o, Şəkidən qaçıb Bakı şəhərində yaşayırmış. Dəfələrlə hüquq-mühafizə orqanları əməkdaşları onunla bağlı Cəyirli kəndinə gəlsələr də, tapa bilməyiblər. H.Əliyevin qohumları Mingəçevirdə, özü isə Bakıda yaşadığından onun yerini müəyyən etmək mümkün olmayıb.
H.Əliyev qətl törətməyi əvvəlcədən planlaşdırıb. Belə ki, o, səhər saatlarında naməlum avtomobillə Cəyirli kəndinə, həyat yoldaşının qaldığı ünvana gəlib. O, bir müddət maşında gözləyib, Z.Əliyevin atası, anası və qardaşı evdən çıxandan sonra evə daxil olub. Həmin müddətdə isə avtomobil onu küçədə gözləyib. Ehtimal edilir ki, o, evdə əqli qüsurlu baldızı və iki azyaşlı övladının gözü qarşısında Z.Əliyevanı üç bıçaq zərbəsi ilə qətlə yetirib.
Qətli törətməkdə çübhəli bilinən ər hadisədən dərhal sonra küçəyə çıxıb və gəldiyi avtomobillə ərazidən qaçıb.
Hazırda H.Əliyevin axtarışları davam etdirilir.
Samir Əli
Şəkidə qətlə yetirilmiş qadının meyiti aşkarlanıb.
Oxu.Az-ın məlumatına görə, hadisə rayonun Cəyirli kəndində qeydə alınıb.
Kənd sakini, 1991-ci il təvəllüdlü Zəhra Məlik qızı Əliyevanın bıçaqla qətlə yetirilmiş meyiti atasının evində aşkar edilib.
Hadisə yerinə hüquq-mühafizə orqanlarının əməkdaşları cəlb ediliblər.
Araşdırmalarla Z.Əliyevanın həyat yoldaşı tərəfindən öldürüldüyü şübhələri ortaya çıxıb.
Hazırda polis əməkdaşları hadisəni törətməkdə şübhəli bilinən şəxsin saxlanılması istiqamətində tədbirlər görürlər.
Samir Əli
