ABŞ Prezidenti Donald Tramp Floridadakı "Mar-a-Lago" iqamətgahının lüks və parlaqlığını Ağ Evin interyerinə gətirməyi qərara alıb. Oval kabinet indi qızılla parlayır - kuboklar və vazalardan tutmuş mələk fiqurları, buxarılar, güzgülər, çərçivələr və hətta lampalara qədər.
Oxu.Az-ın verdiyi məlumata görə, bu barədə BILD xəbər yayıb.
Bildirilir ki, "Qaraçı barokko" kimi tanınan bu zəngin və dəbdəbəli üslub qızıl suyuna çəkilmiş əşyalar və ağır pərdələrin bolluğu ilə Trampın çox xoşuna gəlir.
"Bu, məndə developer instinktlərini oyadır", - deyə prezident etiraf edib.
Tramp, həmçinin sələfləri Bill Klinton və kiçik Corc Buşun portretlərini Oval kabinetdən çıxararaq pilləkənin yanına köçürüb.
"New York Post" qəzeti istehza ilə qeyd edib ki, sabiq prezident Co Baydenin şəkili ümumiyyətlə, zirzəmidə ola bilər.
Trampın planlarında Ağ Evdə qızılla örtülmüş və böyük qızıl çilçıraqlarla bəzədilmiş yeni möhtəşəm rəqs zalının yaradılması var. Təmir təxminən 100 milyon dollara başa gəlsə də, prezident bunu öz cibindən ödəməyə hazırdır.
"Mən rəqs zalları tikməyi bacarıram - "Mar-a-Lago"dakı kimi möhtəşəm zallar", - deyə Tramp hələ fevralda bəyan etmişdi.
Yeniləmələr məşhur "Qızılgül bağçası"na da toxunacaq, bura "Mar-a-Lago" üslubunda "qonaq terrası"na çevriləcək.
Qazon ağ əhəng daşı ilə əvəz olunacaq ki, mətbuat katibi Kerolayn Levittin başına gələn hadisə kimi (dabanının yaş otda ilişməsi) olaylardan qaçmaq mümkün olsun.
Bağın yenidən dizaynı üçün birinci xanım Melaniya Tramp məsuliyyət daşıyır, o, ailənin Floridadakı sevimli iqamətgahında olduğu kimi, qırmızı lalələr və ağ qızılgüllərdən canlı çəpərlər əkməyi planlaşdırır.
