"Dilin mütəmadi təmizlənməsi LOR xəstəliklərinin və mədə-bağırsaq traktı pozuntularının profilaktikasına kömək edir, həmçinin dad reseptorlarının həssaslığını qoruyur".
Oxu.Az xəbər verir ki, bu barədə "İzvestiya"ya rusiyalı stomatoloq-terapevt Arina Sozinova məlumat verib.
Mütəxəssisin sözlərinə görə, dilin səthi mürəkkəb relyefə malikdir: "Çoxsaylı məməciklər geniş, nahamar zona yaradır. Onların girintilərində qida hissəcikləri qalır və bakteriyalar toplanır. Nəticədə dil bir növ mikrofloranın "deposu"na çevrilir.
Məməciklər arasında qalan qida qalıqları bakteriyalar üçün qida mənbəyi rolunu oynayır. Zamanla ağız boşluğunda xoşagəlməz qoxuya - halitoza səbəb olan örtük formalaşır. Bu isə halitozun ən geniş yayılmış səbəblərindən biridir. Buna görə də dilin təmizlənməsi yalnız stomatoloji problemlərin profilaktikası üçün deyil, həm də LOR xəstəliklərinin və mədə-bağırsaq traktı pozuntularının qarşısının alınması baxımından vacibdir.
Bundan əlavə, mütəmadi təmizləmə halitozun şiddətini azaltmağa və dad reseptorlarının həssaslığını qorumağa kömək edir".
Həkim vurğulayıb ki, dili gündə iki dəfə - üzərində örtük görünüb-görünməməsindən asılı olmayaraq diş fırçalanmasından sonra təmizləmək lazımdır. Axşam saatlarında aparılan prosedur gün ərzində yığılan çirkləri aradan qaldırır, səhər isə gecə boyunca formalaşan örtüyü təmizləməyə imkan verir.
